Christina Rosenvinge é hoxe en día unha das cantautoras españolas máis reputadas do momento. Movéndose pola escena alternativa con traballos discográficos que colleitan os eloxios da crítica especializada, ás veces bótase de menos que as radiofórmulas que presumen de ofrecer o melloriño da música non teñan un oco para esta moza de orixe danesa. Por este motivo, moitos se sorprenden das orixes de Christina aló a finais dos 80, cando formaba un dúo con Álex de La Nuez, Álex & Christina, cunha presenza constante nas ondas. O pop cuns retrousos pegadizos era a marca deste exitoso dúo que con todo, non renunciaba a calidade, tanto no son coma nas letras. "Chas! y Aparezco a tu Lado" é un dos seus grandes éxitos máis lembrados, canción que abría o seu álbum epónimo co que se presentaban Álex & Christina en 1987.
A última versión realmente boa que se fixo desta canción débese ós andaluces Supersubmarina, unha das mellores bandas que apareceron ultimamente na escena alternativa e que a incluíron no seu primeiro LP Electroviral (2010).
