(I'm Not Your) Steppin' Stone

Sempre coa idea de deixar unha pegada no rock, tódolos grupos buscan alomenos unha soa canción que lles abra tódalas portas. Paul Revere & The Raiders conseguírono con algunhas cancións como "(I'm Not Your) Steppin' Stone", pertencente ó quinto disco Midnight Ride (1966). Se temos en conta que precisamente neses anos non era doado facerse cun sitio na puxante escena rock, Paul Revere & The Revere tiveron o seu premio sobre todo con esta canción que leva a sinatura de Tommy Boyce e de Bobby Hart, quen tamén se encargaron de producila.

https://youtu.be/UkD5HDDzdZ8

Tamén nese álbum atópase a outra gran canción de Paul Revere and The Raiders "Kicks".

https://youtu.be/bhbU_n62ePY

Xa ese mesmo ano de 1966 "(I'm Not Your) Steppin' Stone") contou coa súa primeira versión, desta volta da banda de ficción The Monkees, que a acabaron popularizando, ó igual que fixeron con "Kicks".

https://youtu.be/nCM7qcRyfKo

E moi influenciados polas principais cancións de  Paul Revere & The Raiders, The Hives achegaban o son desta banda ós seus seguidores en "Two-Timing Touch and Broken Bones", unha das cancións de Tyrannosaurus Hives (2004).

https://youtu.be/zkLEdC-Jn28

Have Love, Will Travel

"Have Love, Will Travel" é unha das cancións de doo-wop que tivo un éxito inmediato trala súa publicación en 1959. Non era para menos, xa que dous anos antes, o autor e intérprete desta canción editara un dos singles que revolucionara a efervescente escena rock and roll, o famosísimo "Louie, Louie", e desde entón agardábanse as composicións de Richard Berry coa esperanza de que volvese crear un novo himno. Se ben é certo que ese fito non se repetiu, a aparición de "Have Love, Will Travel" centrou outra vez os focos en Richard Berry, que non deixara de facer cancións en ningún momento. Sen ter a mesma repercusión que "Louie, Louie", "Have Love, Will Travel" tamén deixou un pouso importante na música, sobre todo a partir da versión de The Sonics.

http://youtu.be/mr2fKFkcxsg

A pesar de que unha das primeiras versións que se fixeron de "Have Love, Will Travel", a de Paul Revere and the Raiders en 1964, non tivo case transcendencia, pero a de The Sonics un ano despois no seu álbum de debut Here Are The Sonics (1965) daríalle unha nova vida a este tema de Berry. The Sonics, uns dos primeiros grupos que facían garage rock, transladaron a este estilo "Have Love, Will Travel" converténdoo nunha das cancións de referencia para moitas bandas e aínda na actualidade se poden atopar novas versións coma a de The Black Keys en 2003 e a de Sky Saxon  en 2011.

http://youtu.be/20S_kwNb4rg

A presenza de "Have Love, Will Travel" tamén é constante na canción de The Hives "Main Offender", do álbum Veni Vidi Vicious (2000). Esta canción dos suecos considérase practicamente unha versión da de The Sonics cunha nova letra, pero aínda así vén a demostrar que o espíritu da versión de The Sonics segue moi vivo.

http://youtu.be/17Ft8nQjqNw

Don't Bring Me Down

Co álbum Discovery publicado en 1979 a Electric Light Orchestra aupouse nos primeiros postos das listas de vendas de Reino Unido e atopou o seu lugar como unha das mellores bandas de rock da música. O éxito dese disco débese a unhas cancións escritas con delicadeza e cunha enerxia desbordante que se transmite en cada nota. Discovery péchase con "Don't Bring Me Down", unha das mellores creacións de Jeff Lynne e unha das que mellor representa o son da Electric Light Orchestra.

http://www.goear.com/listen/cd924b1/dont-bring-me-down-electric-light-orchestra-elo

Unha das cancións máis versionadas da ELO ó longo do tempo, tamén atopou acomodo no hip hop en forma de sample. Jungle Brothers recorre a ela no seu debut Straight out the Jungle en 1988.

http://youtu.be/4cj8zZmFbds

Recentemente, The Hives recuperou os riff de "Don't Bring Me Down" para a súa canción "Go Right Ahead", o single co que presentaban o seu último disco Lex Hives (2012).

http://www.goear.com/listen/e403e2a/go-right-ahead-the-hives

Louie Louie

Richard Berry asinou en 1956 unha das cancións máis lendarias do rock, "Louie Louie", un clásico entre os clásicos que inspirou a artistas de tódalas xeracións, especialmente na versión que fixeron os Kingsmen. Mais Berry tamén baseou parte do ritmo da súa mítica canción nos sons procedentes de Cuba, concretamente no tema "El Loco Cha Cha Cha" de René Touzet, que popularizou Ricky Rillera and the Rhythm Rockers.

http://youtu.be/iApNzdSnJw4

O caso é que a Richard Berry lle quedou así Louie Louie. Ofrecemósvos á versión orixinal de 1957.

http://www.goear.com/listen/8e97f6f/louie-louie-richard-berry

As versións que se fixeron de "Louie Louie" dende os anos 60 son incontables. En España tivo moito éxito á versión en castelán de Los Corbs en 1966.

http://www.goear.com/listen/7af27cc/louie-louie-los-corbs-espana

Ademais das versións, "Louie Louie" inspirou dúas cancións que á vez tamén son un referente na música rock. Unha delas é "You Really Got Me" de The Kinks en 1964.

http://www.goear.com/listen/1ccfc4c/you-really-got-me-the-kinks

A segunda delas é "I Can't Explain" de The Who, de 1965.

http://www.goear.com/listen/fc6a9ae/i-cant-explain-the-who

"I Can't Explain" tamén serviu para crear novas cancións como é o caso de "Walk Idiot Walk", tema dos sueco The Hives do álbum Tyrannosaurus Hives (2004).

http://www.goear.com/listen/f0b436a/walk-idiot-walk-the-hives

Do mesmo xeito en que tamén inspirou cancións con estilos afastados do rock. "Going Out to My Head", tema de Fatboy Slim, do álbum de 1997 Better Living Throug Chemistry, que tamén contén un sample da canción de Led Zeppelin  "The Crunge".

http://youtu.be/tmw94O9OWRE

Por certo, non nos esquecemos de "The Crunge", do disco Houses of the Holy (1973) para que vexades o parecido coa canción de Fatboy Slim.

http://www.goear.com/listen/21ec8b2/the-crunge-1973-led-zeppelin

All Day and All of the Night

O dous de outubro de 1964 aparecía no mercado británico o primeiro LP dunha banda chamada a facer historia. Os irmán Davies puñan en marcha de maneira oficial a andaina de The Kinks cun álbum epónimo que contiña catorce cancións entre as que se incluía "You Really Got Me", unha das cancións máis emblemáticas do grupo londinense. Pero nese mesmo mes de outubro editaban un single que non estaba no disco e que tamén se convertiría noutro dos grandes éxitos de The Kinks. "All Day and All of the Night" acabaría por ser unha das cancións de Ray Davies máis versionadas e tamén unha das máis influentes.

http://www.goear.com/listen/ab6e345/all-day-and-all-of-the-night-the-kinks

Outra das grandes bandas dos 60 foi The Doors. O carisma de Jim Morrison trascendeu máis aló do ámbito musical e hoxe en día practicamente non hai banda de rock que negue a influencia que a música de The Doors no seu son. Aínda así, no seu tempo The Doors tamén se fixaron en The Kinks, como ben se ve en "Hello, I Love You", do álbum Waiting for the Sun (1968), talvez a canción máis polémica de The Doors, xa que sobre ela pesa a sospeita dun posible plaxio de "All Day and All of the Night". Con todo, o guitarrista de The Doors Robby Krieger indicou que se basearan no tema de Cream "Sunshine of Your Love", que por outra parte, é unha das cancións de Cream que máis se presta á inspiración de moitos grupos, como veremos na próxima entrada.

http://www.goear.com/listen/5729e16/hello-i-love-you-the-doors

"Hello, I Love You" tamén e das máis versionadas de The Doors por grupos tan diferentes como The Cure, Eurythmics e Siouxsie Sioux entre outros, mais unha das que lle renden homenaxe na letra é a de Pulp "Dogs Are Everywhere", que saíu como single en 1986.

http://youtu.be/QNrk3YxuUi0

Mais volvendo á canción de The Kinks, The Hives tamén se inspiraron nela para crear "Hate to Say I Told You So" que estaba no seu debut Veni Vidi Vicious (2000).

http://www.goear.com/listen/1f89eac/hate-to-say-i-told-you-so-the-hives