Malia que o cuarto álbum de ABBA Arrival (1976) contén algunhas das cancións máis memorables do grupo sueco, a canción que lle dá título é unha composición instrumental, algo non mi frecuente no repertorio de ABBA e polo tanto, case máis ben unha das cancións máis facilmente esquecibles destes suecos. E non obstante, "Arrival", sen ser nada doutro mundo, é das cancións de ABBA máis versionadas. O motivo, desde logo, haino que buscar no seu carácter instrumental, algo sempre moi valorado á hora de facer versións, pois as posibilidades de "moldear" a canción orixinal son moi amplas, aínda que moitas veces, como lle sucede a "Arrival", non sempre se aproveitan moi ben.
Mike Oldfield realizou unha versión de "Arrival", xa que a versión orixinal ten un aire folk que se adapta ben ó estilo deste músico. O novo "Arrival" inclúese no álbum QE2 (1980).
Pero como moitos temas instrumentais, algúns artistas sentiron a tentación de escribirlles unha letra para poder cantalos. No caso de "Arrival" apareceron dúas versións en francés con distinta letra o mesmo ano, en 1977. Unha delas é a de Michèle Torr titulada "J'aime".
A outra é a de Petula Clark co título "La Vallée", que, como a de Michèle Torr, carece de calquera tipo de innovación e ofrécenos unha balada moi do gusto da época.
Máis rompedora é a canión de Scooter "Roll Baby Roll", pertencente ó álbum The Stadium Techno Experience (2003), que coas bases de "Arrival" conforma un tema techno na liña do estilo deste grupo alemán.
