Rain (4)

Seguimos cunha nova entrada monográfica dedicada á serie que estamos facendo sobre a choiva. Desta volta, vamos a centrarnos nalgunhas das cancións máis destacadas dos anos noventa, pero antes de ver esa pequena lista queremos comezar cunha canción de Led Zeppelin, outra que Jimmy Page escribiu á chuvia, "Fool in the Rain", ademais da de "The Rain Song" que xa vimos noutra entrega. "Fool in the Rain" é unha das cancións do álbum In Through the Out Door (1979).

Led Zeppelin

https://youtu.be/d52M5M6OOXs

E agora si, imos con cinco cancións dos noventa sobre a choiva, aínda que avisamos que haberá máis en próximas entregas. Simplemente "Rain" é como titulou Madonna a unha das súas cancións do álbum Erotica (1992).

https://youtu.be/15kWlTrpt5k

 

Roxette tamén é outro dos grupos que mostran unha enorme preferencia polos títulos con "Rain" e o exemplo máis claro témolo no álbum Tourism (1992), con dúas cancións. Unha delas é "The Rain". A outra, o single "Queen of Rain", deixámola para outra entrega.

 

 https://youtu.be/hkm-X55zZxs

 

Counting Crows deron todo un pelotazo co seu álbum de debut August and Everything After (1993), que ademais do famosísimo "Mr. Jones" tamén contén esta fantástica canción "Rain King", que tamén foi single.

https://youtu.be/izeDRfkyMAQ

Outra canción que fala da choiva daquela época é a de 2unlimited "Nothing Like the Rain", incluída no álbum Real Things (1995). É unha das máis tranquilas do dúo neerlandés, que marcaron unha época co seu son techno.

https://youtu.be/P5GUa5HgSno 

Como unha especie de resposta á canción de Jesus and Mary Chains, que xa vimos noutra ocasión xurdiu a canción de Garbage "Only Happy When It Rains" no álbum epónimo que lles servía de debut en 1995.

 https://youtu.be/esEdC0c3YI4

O primeiro corte do oitavo álbum de Erasure, Cowboy (1997), foi precisamente "Rain"

https://youtu.be/cNFmyTn6vWc

Because the Night

De vez en cando os compositores xúntanse para crear novas cancións, que ben gravan en solitorio ou  ben producen unha colaboración que normalmente adoita ser moi estimada. Bruce Springsteen e Patti Smith escribiron "Because the Night", que en principio só ía formar parte do álbum Darkness of the Edge of Town (1978) de Springsteen, pero este quedou tan desencantado co resultado cando a gravou, que finalmente non se incluíu no álbum nin en ningún dos posteriores do Boss. No entanto, Patti Smith, que naquel momento preparaba o álbum Easter (1978) no estudio contiguo ó de Bruce Springsteen, decidiu gravala para o seu álbum despois de que Jimmy Iovine, o produtor tanto do disco de Patti Smith coma do de Springsteen, lla ofrecese, e así "Because the Night" converteuse no primeiro single do álbum de Patti Smith Group e unha das cancións máis aclamadas da compositora.

http://youtu.be/xACZHv-sLCg

E desde logo, moitas  das versións que se fixeron de "Because the Night" tiveron moito éxito e nin sequera así Bruce Sprinsgteen se animou a tentar gravala de novo, malia que é habitual que a cante nalgúns concertos. Das versións exitosas, destaca a de 10000 Maniacs no seu MTV Unplugged (1993).

http://youtu.be/dPC1hOTt9eI

Un ano antes da versión de 10000 Maniacs, nas discotecas soaba unha versión dance a cargo de Co.Ro e Taleesa, que fixo que a popularidade do tema se disparase.

http://youtu.be/2IGfjBi4HcA

Tahúres Zurdos gravaron unha versión en castelán co título "La Noche Es", onde respecta con bastante fidelidade á letra orixinal. Pertence ó disco El Tiempo de la Luz (2000).

http://youtu.be/X_PP3xyxyxg

Das últimas versións que se fixeron, a máis interesante quizais sexa a de Garbage coa colaboración de Screaming Females, un single que editaron en 2013.

http://youtu.be/tOmKGjy-Ct0

Talk of the Town

Moitas veces vemos con frecuencia como a unha canción orixinal se lle cambia a letra manténdolle a mesma melodía. Isto dá lugar a un novo tipo de versión que en ocasións se lle denomina "homenaxe" á fonte primixenia e noutros "plaxio" se non conta co consentimento dos autores orixinais. Máis raro é atopar unha  mesma letra cunha melodía diferente. Algo así lle ocorreu a The Pretenders coa canción "Talk of the Town", do disco Pretenders II (1981), ó que anos máis tarde unha parte da súa letra ía aparecer noutra canción, pero neste caso, de Garbage. Xaora, a banda de Shirley Manson, consciente do barullo que se podería montar, contactatou con Chrissie Hynde para pedirlle permiso, cousa que a líder de The Pretenders lles concedeu ós rapaces de Garbage sen problema, evitando unha polémica que non beneficiaría a ninguén.

http://youtu.be/RtWIkLh2u30

E xa co permiso conseguido, Garbage gravou tranquilamente "Special", unha das cancións destacadas do álbum 2.0 (1998).

http://youtu.be/XneoyanCy6E

Bend Me, Shape Me

Larry Weiss e Scott English son dous dos compositores máis recoñecidos dos anos 60, xa que moitas das súas creacións acadaban os postos altos das listas de vendas sen demasiada dificultade, sempre nas voces de grupos e artistas que sabían que traballar con eles era un aval á fama. A banda de Ohio The Outsiders foron dos primeiros afortunados en contar coa súa colaboración, aínda que finalmente, a súa andaina como banda non tivo un recorrido moi extenso. No álbum The Outsiders In (1967) inclúen "Bend Me, Shape Me", un dos éxitos coa sinatura de English e Weiss.

http://youtu.be/IZU_639WNXs

E seguramente debido a que The Outsiders non chegaron a consolidarse como banda, a versión orixinal de "Bend Me, Shape Me" quedou un pouco no esquecemento, xa que en decembro de 1967 The American Breed debutaban cunha nova versión de "Bend Me, Shape Me", que foi a que triunfou. The American Breed elixírona coma canción estrela do seu disco de debut ó titulalo Bend Me Shape Me.

http://www.goear.com/listen/a5be1ac/bend-me-shape-me-american-breed

Varias décadas despois, moitos críticos sinalaron que o retrouso de "Bend Me, Shape Me" semellaba estar presente no éxito de Garbage "I Think I'm Paranoid", segundo single do disco Version 2.0 (1998).

http://www.goear.com/listen/b829515/i-think-im-paranoid-garbage

E xa bastante máis afastados pero cuns toques que tamén lembran á canción de The Outsiders, Savage Garden incluíron no seu debut "Break Me Shake Me" en 1997.

http://youtu.be/pTWk867U6j0

Bedtime Story

A comezos dos anos 90 a repercusión que a música de Björk acadou en medio mundo non deixou indiferente a ninguén, nin tan sequera para a mesma Madonna, que cun olfacto privilexiado para atopar o éxito, decidiu contar coa colaboración da islandesa no álbum Bedtime Stories (1995). Xa no anterior disco de Madonna, Erotica (1992), a raíña do pop xa se reinventara probando cuns sons moito máis electrónicos sen renunciar ó seu estilo provocativo, que xa era formaba parte da posta en escena de Madonna. Para Bedtime Stories, Madonna conseguiu que Björk lle escribise un tema, o envolvente "Bedtime Story".

http://www.goear.com/listen/9576091/bedtime-story-madonna-

E moi pronto, a influencia deste tema de Madonna se fixo notar. En menos dun ano, Garbage gravaban "Number One Crush", unha canción para a banda sonora da película "Romeo e Xulieta", que xa aparecera nas caras B dalgúns singles que Garbage editaran. Algúns dos produtores desta canción son os mesmos que traballaron con Madonna e non dubidaron en engadir algún sample de "Bedtime Story" á canción de Garbage. Publicouse a finais de 1996 na banda sonora da película.

http://www.goear.com/listen/4b623dc/number-1-crush-garbage

Train in Vain

Trala eclosión do punk nos anos 70 en Reino Unido coa irrupción dos revolucionarios Sex Pistols, outras bandas británicas promoveron tamén a consolidación deste fenómeno en principio marxinal dentro do rock. Xunto a mencionada banda de Johnny Rotten e Sid Vicious e Jam, a banda de Paul Weller, destaca The Clash, liderados por Mick Jones, que en 1979 publicaban o seu terceiro traballo discográfico London Calling, que contén "Train in Vain", unha xoia ó final do álbum que non aparece no tracklist. Non por iso deixa de ser un dos temas máis importante e recoñecidos da banda británica, moi influente na historia do rock.

 http://www.goear.com/listen/50698e1/train-in-vain-the-clash

Versionada un número considerable de veces por artistas que recoñecen a influencia de The Clash no seu son, unha das máis destacadas é a que fixo Annie Lennox no seu disco de versións  Medusa (1995) dándolle un toque soul.

 http://www.goear.com/listen/0e7c745/train-in-vain-annie-lennox

Como sample aparece na canción de Garbage "Stupid Girl" do seu debut Garbage (1995). A banda do produtor Butch Vig e Shirley Manson empregaron como base o ritmo da batería de "Train in Vain".

 http://www.goear.com/listen/de680e2/stupid-girl-garbage

"Train in Vain" tamén foi adaptada ó portugués pola banda de rock brasileira Ira!, que a gravaron para un concerto acústico de MTV Brasil en 2004. Titulárona "Pra Ficar Comigo".

 http://www.goear.com/listen/20b7788/pra-ficar-comigo-train-vain-ira