Sun

Retomamos de novo os posts monográficos. O de hoxe vai dedicado ó Sol, que coa súa luz anuncia a chegada do bo tempo, algo que metaforicamente sempre se asociou a un período de felicidade. As seis cancións que eliximos para esta entrada son unha pequena mostra dunha amplísima variedade de cancións que levan no título a palabra "sol", así que non descartamos que haxa unha segunda parte desta entrega noutra ocasión. Acéptanse propostas.

A primeira delas é a canción dos Beatles "Here Comes the Sun", escrita por George Harrison, que se incluíu en Abbey Road (1969).É sen dúbida unha das mellores cancións do álbum e evoca os beneficiosos efectos do sol.

https://youtu.be/C5E_zXbmrlM

Janis Joplin tamén lle escribiu unha canción ó sol co espíritu do flower power. O resultado foi "Flower in the Sun", un single póstumo que se publicou en 1972.

https://youtu.be/2vNczrinFRo

No álbum de 1987 The Uplift Mofo Party Plan Red Hot Chili Peppers incluían a canción "Behind the Sun", que haberían de sacar como single cinco anos despois.

https://youtu.be/gsC9KwiknTs

Con reminiscencias cara ó final da canción dos Beatles "Here Comes the Sun", Soda Stereo asinou no álbum Canción animal (1990) a fantástica "Cae el sol", unha das mellores composicións de Gustavo Cerati e Daniel Melero.

https://youtu.be/7pxzYVc_lNQ

A seguinte canción que vén a continuación foi publicada en 1997. Pertence ó album de Supergrass In It for the Money (1997) e trátase de "Sun Hits the Sky", single que se publicou na primavera, aproveitando a chegada do sol e as altas temperaturas.

https://youtu.be/OJ8TYNpJdLg

E xa para rematar por hoxe, quedamos coa sensacional "Sun" de Two Door Cinema Club, que aparece no álbum Beacon (2012).

https://youtu.be/sKyK1Mme9Sc

Kansas City Blues

Moi poucas cancións conseguen dar orixe a unha manchea de grandes temas derivadas da súa melodía e a súa estrutura. "Kansas City Blues", o blues de Jim Jackson que se publicou en 1927 pode presumir de estar detrás de grandes clásicos do blues e do rock e de inspirar outras cancións de nova factura baseadas na súa letra. Foi a primeira gravación que fixo Jim Jackson e tamén a máis influente de toda a súa carreira.

http://youtu.be/RMBO2Sb_91k

Dous anos despois a estela de "Kansas City Blues" comezaba a mostrarse no blues de Charley Patton "Going to Move to Alabama" (1929), que como vimos hai uns días tamén tivo o seu protagonismo en "Shake Your Moneymaker".

http://youtu.be/mhKGnLiApis

Habería de pasar máis dunha década para que a melodía de "Kansas City Blues" volvese emerxer, esta vez co ritmo máis acelerado. Hank Williams incorporouna a "Move It On Over" (1947).

http://youtu.be/t681jFKHOs8

Máis achegada a "Move It On Over" pero aínda con ecos dos blues anteriores, Bill Haley & His Comets gravaron en 1954 unha das máis grandes cancións do rock and roll, a incrible "Rock Around the Clock".

http://youtu.be/Ud_JZcC0tHI

Á vez, "Rock Around the Clock" tamén ten algo da composición de Leroy Anderson "The Syncopated Clock" (1947).

http://youtu.be/CrpdQngwk2g

"Rock Around the Clock" ten infinidade de versións, pero imos quedar con dúas en castelán e adaptadas de forma distinto, que tiveron un gran éxito no seu momento nos seus respectivos países. A primeira, de 1956, é de Gloria Ríos, unha artista mexicana que titulou a súa versión co nome de "El relojito".

http://youtu.be/GILybBOmMrc

A outra é a versión española de 1962 a cargo de Miguel Ríos cando aínda se facía chamar Mike Ríos e a gravou co título "Twist del reloj". Non deixa de ser unha coincidencia que tanto Gloria como Miguel teñan o mesmo apelido, así como a querencia polo tema de Bill Haley and His Comets.

http://youtu.be/QS0ydyQS_Qs

Con algunha reminiscencia de "Rock Around the Clock", anos despois Cheap Trick gravou "Clock Strikes Ten" no álbum In Color (1977).

http://youtu.be/x1bzkzUJ92w

Pero volvamos á orixe, ó blues de Jim Jackson, "Kansas City Blues". Como dicíamos tamén inspirou outras cancións apegadas ó blues que nada teñen que ver con "Rock Around the Clock", como é o caso de "Kansas City", tema de Leiber e Stollen que gravou por primeira vez Little Little Littlefield en 1952.

http://youtu.be/kTsfrPsikXc

A última e tamén das máis coñecidas é a de Janis Joplin, "Kansas City Blues", unha versión moi persoal desta artista.

http://youtu.be/PAYUbqnufgI

Move Over

Janis Joplin estaba chamada a ocupar o trono que deixou Billie Holiday no blues e demostrou na súa curta carreira que non só aceptaba ese reto, senón que tamén estaba disposta a ir un paso máis aló, nun momento fundamental para a música como foron os anos 60. Cun destino marcado polas drogas ó igual que a gran dama do blues, Janis Joplin condensou nos seus catro discos editados, así como nas súas actuacións en directo rock, soul, blues, country e folk cunha enerxía e unha sensibilidade que ía deixar unha fonda marca en moitos artistas, tanto nos coetaneos que coincidiron con ela nos escenarios dos festivais, coma nos que viñeron detrás. Pearl, o seu último traballo, foi publicado en 1971 tres meses despois do falecemento de Janis Joplin e é unha verdadeira xoia. Ábrese con"Move Over", un tema que leva a sinatura da artista texana.

http://www.goear.com/listen/eefb741/move-over-janis-joplin

Versionada por un sinfín de artistas de todos os estilos, a música de Janis Joplin non foi indiferente tampouco ás bandas de heavy métal. Barón Rojo animáronse a versionar "Move Over" no seu álbum de versións Perversiones (2003) dándolle o seu toque heavy.

http://youtu.be/96U5elKXgm8