Take This Waltz

A obra poética de Federico García Lorca é universalmente coñecida máis aló das fronteiras españolas. O xenial poeta granadino, o máis representativo da Xeración do 27, pasou unha breve tempada en Nova York invitado pola Universidade de Columbia en 1929 durante a cal, puido ver os efectos inmediatos que produciu o crack da bolsa. Froito desas experiencias na cidade dos rañaceos, é o poemario Poeta en Nueva York, considerada polos especialistas como a mellor obra de todas as de Lorca. Indubidablemente, a influencia de Poeta en Nova York foi fundamental noutros autores que tiveron esta obra como referencia. Leonard Cohen, gran coñecedor da cultura española, rendeulle unha sentida homenaxe na canción "Take This Waltz", unha adaptación do poema "Pequeño vals vienés", que aparecería no álbum tributo Poets in New York (1986).

http://youtu.be/JQm1OmLMNno

Gran amante da música de Leonard Cohen e da obra literaria do seu paisano Lorca, Enrique Morente fixo un disco dedicado a ambos titulado Omega (1996) en colaboración con Lagartija Nick. Nel musicaliza algúns dos poemas de Lorca e non podían faltar as adaptacións musicais que Cohen xa realizara, aínda que esta vez en castelán e coa inconfudible arte flamenca de Morente. "Take This Waltz" volve ser o "Pequeño vals vienés".

http://youtu.be/QiPWkz54R0U

O interese pola obra de Lorca é unha constante na música española dos últimos anos, -tamén na galega, pois tampouco convén esquecer o traballo de Luar na Lubre cos poemas galegos do autor granadino-, así que cada pouco aparecen novos discos sobre a súa obra. Un dos máis importantes tralo de Morente, é o Lorquiana (1998) de Ana Belén, onde versiona o "Pequeño vals vienés" de Enrique Morente.

http://youtu.be/AtLyKjyA0Pk

T.V. Eye

Malia que hoxe Fun House (1969) é un disco de culto e moitas bandas e artistas cítano como clave no desenvolvemento das súas traxectorias, o certo é que o segundo álbum de The Stooges pasou máis ben sen pena nin gloria no momento da publicación, pero dende o instante en que se empezou a xestar, Iggy Pop ía medrar tamén como músico, unha etapa de crecemento que habería rematar anos máis tarde, cando Iggy decidiu voar en solitario. Para entón Fun House quedaba no imaxinario como un feixe de cancións que se deberían ter en conta para calquera que se quixese dedicar ó hard rock. Normalmente noméase "Loose" como a gran canción dese disco, pero tampouco hai que deixar de lado que outras como "T.V. Eye" tamén se converteu na favorita dalgúns.

http://youtu.be/ry4SVeLyLGk

Máis ca versións, "T.V. Eye" foi decisiva na composición dalgunhas novas cancións por parte de grupos que tiñan a The Stooges coma unha referencia. Unha das máis importantes é a da banda inglesa Spacemen 3 que aparece no álbum Sound of Confusion (1986) co título de "O.D. Catastrophe". Non é a única proba da admiración que mostra Spacemen 3 por The Stooges no seu álbum de debut, xa que nel versionan "Little Dog", outra das grandes cancións de The Stooges.

http://youtu.be/SaBz49jZo_Y

Outra canción que tamén lle debe moito a "T.V. Eye" é "Napalm", de Lagartija Nick, pertencente ó primeiro disco dos granadinos Hipnosis (1991).

http://youtu.be/-NddoB0uFKc

Disappeared

Se hai unha banda que revolucionou a escena underground nos anos 80 deixando un pouso que habería de alimentar a centos de bandas en todo o mundo, esa é Sonic Youth. Fundada en Nova York por Thurston Moore, Kim Gordon, Lee Ranaldo, Steve Shelley e Mark Ibold, Sonic Youth foi trazando un camiño na escena independente con cada disco que ían editando, converténdose nun referente que aínda na actualidade non acadou ninguén máis. En 1990 publicaron Goo, o sétimo disco de longa duración, un dos máis significativos da carreira, xa que despois dunha década Sonic Youth atravesaba unha delicada liña ó ficharen os seus membros polo selo dunha discográfica multinacional. Se para moitos grupos iso supuña unha proba de fogo que levaba a un resultado incerto renunciando a súa reputación, os rapaces de Sonic Youth saíron indemnes, pois o cambio non provocou unha rotura son que acostumaban facer, e é máis, ata conseguiron gañar novos adeptos. O single "Disappeared" é dos máis celebrados e hoxe considérase unha das mellores cancións dos neoiorquinos.

http://youtu.be/TBPcnMBDb5M

Especialmente "Disappeared" tivo unha importante influencia no tema que lle dá título ó primeiro disco dos granadinos Lagartija Nick, unha das bandas de referencia da escena indie española. En 1991 facían a súa aparición con Hipnosis.

http://youtu.be/CfyDKCAsZyQ