Trombone Dixie

Cando parecía que a música de The Beach Boys quedaba de lado nos electrónicos anos oitenta, a lonxeva banda volveu á carga cunha reedición do seu carismático Pet Sounds en 1990, que volvería facer as delicias dos nostálxicos e de paso, abríalles ás portas as novas xeracións, que puideron dese xeito aproximarse a unha das bandas máis importantes e innovadoras da historia da música. A reedición de 1990, case vinte e cinco anos despois da súa publicación, rescata algúns temas  inéditos que no seu momento se descartaran, e tamén outras que foron o embrión dalgunhas que despois si apareceron na primeira edición ou que simplemente se editaron como singles independentes. Unha desas cancións inéditas é o tema instrumental "Trombone Dixie".

https://youtu.be/pbq5laN2cIM

"Trombone Dixie" está moi emparentado co single que The Beach Boys sacou en 1965  "The Little Girl I Once Knew", xa que ambos teñen certos parecidos. Sen dúbida vese que Brian Wilson compúxoos practicamente á vez.

 https://youtu.be/VFudhpBf0q8

Pero ademais de "The Little Girl I Once Knew", "Trombone Dixie" tamén serviu de base para "Had to Phone Ya", unha das cancións de 15 Big Ones (1976).

https://youtu.be/PokrTh9Jnuw

Shortnin' Bread

O escritor e poeta James Whitcomb Riley publicou en 1900 o poema "Shortnin' Bread" e acadaría a categoría de clásico despois de que en 1915 E.C. Perrow lle puxese música, facendo que se popularizase de tal maneira que para moitos se confunde con calquera canción tradicional. Por se fose pouco, dende a data temperá en que Perrow a editou sucedéronse continuas versións que axudaron a perpetuar a crenza de que se trata dunha canción arraigada na tradición popular. Velaquí unha versión da famosa canción.

https://youtu.be/XTZPM-a89_M

Tamén en torno á melodía de "Shortning' Bread" se crearon novas cancións, algunhas de estilos tan diferentes ó folk coma pode ser o R&B. Ese é o caso da coñecida canción de Joe Liggins and His Honeydrippers "The Honeydripper" (1945).

https://youtu.be/MbkjzmXKevc

Á súa vez, "The Honeydripper" tamén supuxo unha fonte de inspiración para Little Walter, quen creou o tema blues "Evan's Shuffle", que popularizou Muddy Waters en 1950.

https://youtu.be/joUnuNfOktg

Pero a transcendencia de "Shortnin' Bread" vai máis aló da relación entre folk e blues. O rock and roll tamén se beneficiou dos seus acordes, como ben se aprecia na canción de Dave "Baby" Cortez "The  Happy Organ", pertencente ó álbum do mesmo nome de 1959.

https://youtu.be/FNxpU_ITpMQ

E non podiamos rematar esta entrada sobre "Shortnin' Bread" obviando a versión de The Beach Boys, talvez as mellor de todas as que se fixeron. A obsesión de Brian Wilson con esta canción foi tal que o grupo a gravou en numerosas ocasións pero só a incluíron oficialmente no álbum  L.A. (Light Album)  (1979).

https://youtu.be/ygBT4nMw-Zg

Do It Again

Como tiñan por costume moitas bandas, The Beach Boys adoitaban editar varios singles no verán, meses antes de acabar de preparar un novo álbum. Deste xeito, asegurábase un determinado número de vendas atraídas por eses singles de promoción. O álbum 20/20 (1969), unha das grandes obras dos Beach Boys, publicouse no mes de febreiro, pero a canción "Do It Again" coa que se abre o disco, editárase como single no verán anterior como un anticipo de todos os bos temas que se ían atopar no álbum. E xa que non podían faltar a súa cita co verán, os Beach Boys colocaron este single nos postos principais das listas de éxitos.

https://youtu.be/AtLY9oLTGMg

Os coros dos Beach Boys nesta canción influenciaron a canción de Eric Carmen "She Did It", unha das que compoñen o álbum Boats Aginst the Current (1977). Mesmo o beach boy Bruce Johnston participou na gravación.

https://youtu.be/nfDpdzr9kQY

"Do It Again" é unha das cancións que Brian Wilson volveu gravar para o seu segundo álbum I Just Wasn't Made for These Times (1995). 

https://youtu.be/xw40t2xpxKc

Air tomou algúns elementos de "Do It Again" no seu tema "Remember", do álbum Moon Safari (1998) co que se deron a coñecer.

https://youtu.be/B0rk_15Z5kU

Los Reactivos animáronse a versionar "Do It Again" en castelán co título "Hazlo otra vez", canción do EP Split Single (2008).

https://youtu.be/3KqJfzgjZP0

Wipe Out

Hai xa moitas décadas que o rock instrumental carece de forza para situarse en primeiro plano, pero na década dos sesenta gozou do favor do público, que lle dirixía tanta atención como a calquera nova variante do rock con letra. De aí que grupos coma The Tornados, The Trashmen e os que hoxe vos presentamos, The Surfaris, entre outros, que prescindían da voz en moitas das súas composicións tamén triunfasen nas listas de éxitos con temas instrumentais. No caso de The Surfaris, que se especializaron no surf rock, o maior éxito que acadaron foi co single "Wide Out", que o quinteto formado por Bob Berryhill, Ron Wilson, Ken Forssi, Pat Connolly e Jim Fuller editou en 1963.

http://youtu.be/p13yZAjhU0M

Unha das versións máis coñecidas de "Wipe Out" é a que fixo o dúo de hip hop The Fat Boys en colaboración coa banda máis representativa do surf rock de tódolos temos, The Beach Boys, no álbum Crushin' (1987) e desta volta, xa con letra.

http://youtu.be/U1cxjUGDbJU

A sombra de "Wipe Out" tamén se pode notar durante a canción de Foo Fighters "All My Life", pertencente a One by One (2002).

http://youtu.be/gnVEG_waiqg

Hungry Heart

Bruce Springsteen foise convertendo con cada disco que sacaba na voz máis importante dos cantautores de Estados Unidos, con permiso de Dylan, ó retratar a sociedade americana e describir de maneira certeira todas as emocións posibles, que ían moito máis alá do tópico de mozas e coches con que algúns intentaron ningunear a traxectoria do Boss. Pero a verdade é que coa sinxeleza que o caracteriza, Springsteen foi escribindo himnos que chegaban a calquera que se parase a escoitalos. En The River (1980), quinto disco deste músico de Nova Jersey, Springsteen consagrábase un pouco máis como un artista capaz de crear cancións imperecedeiras en pouco tempo. O primeiro single, "Hungry Heart", é hoxe un dos seus clásicos e iso que en principio Springsteen a compuxera para cederlla ós Ramones.

http://youtu.be/lQSn26zCXYQ

A influencia de Bruce Springsteen é tan forte que mesmo músicos da talla dos Beach Boys se renderon a ela. En 1985 a veterana banda publicou un disco epónimo cuxo single de presentación foi "Getcha Back", tema escrito por Mike Love e Terry Melcher cun son que inevitablemente fai pensar en "Hungry Heart".

http://youtu.be/7c3OvUiyD8c

The John B. Sails

No século XIX os estudos de etnografia víronse impulsados polo crecente interese que había en torno á cultura popular dos pobos, que se mantivo aínda moi vivo ben entrado o século XX. En 1916 o poeta  inglés Richard Le Gallienne publicou a letra dunha das cancións tradicionais de Nassau, a coñecida co título de "The John B. Sails", o que a deu a coñecer nos demais lugares da Commonwealth. Once anos despois, o tamén poeta Carl Sandburg incluíuna na colección de cancións tradicionais The American Songbag, o que supuña a primeira gravación da canción. Tras el, non tardaron en gravala Blind Blake en 1930 e Alan Lomax cinco anos despois baixo o título "Histe Up The John B. Sail", pero por desgraza, non atopamos rastro destas primeiras gravacións. Habería que esperar a 1950 para que o John B. volvese navegar polos estudios de gravación. Co título "Wreck of the John B." The Weavers revivían o vello clásico das Bahamas.

http://youtu.be/8CvTloNDFFg

Dous anos despois era a quenda da versión de precisamente un músico das Bahamas, Blake Alphonso Higgs,  chamada "John B. Sails".

http://youtu.be/Kk7I_KWkswQ

En 1958, "The John B. Sails" fíxose aínda se cabe máis popular coa versión de The Kingston Trio, e por primeira vez publicábase co título "Sloop John B.", que sería o máis habitual nas seguintes versións.

http://youtu.be/Q8NVY0INJFk

No entanto, Johnny Cash decidiu bautizar a súa con "I Want to Go Home", un dos versos do retrouso, talvez para distinguirse da versión de The Kingston Trio, xa que a de Johnny Cash se editou en 1959, tan só

un ano despois da de The Kingston Trio.

http://youtu.be/kZrPslkYL58

Pero quen de verdade ía a levar este canto tradicional das Bahamas ó máis alto, serían The Beach Boys no álbum Pet Sounds (1966). Co mesmo título que a versión de The Kingston Trio, "Sloop John B.", a banda de Brian Wilson completou un proceso de renovación da canción sen perde-la esencia orixinaria.

http://youtu.be/HW5yLvoJMD4

The Dean and I

A mediados dos anos 70 o pop máis comercial e o estilo doo-wop, así coma o rock and roll máis clásico das dúas décadas anteriores considerábanse xa tan afastados dos novos sons que dominaban a música do momento que había artistas que non dubidaban en facer algún tipo de parodia, que no fondo agochaban un sentido respecto e admiración polas vellas tendencias musicais. É así como Graham Gouldman, gran coñecedor da música dos 60 e autor de moitos dos seus éxitos lembraba o estilo máis lúdico de grupos coma os Beach Boys no tema "The Dean and I", unha das cancións do primeiro disco de 10cc, o proxecto que montou xunto con Eric Stewart, Kevin Godley e Lol Creme, e que debutaban en 1973 cun álbum epónimo. "The Dean and I" tamén está inspirado nunha canción de Jerry Lee Lewis.

http://youtu.be/GJWnNmXiL8M

A canción de Jerry Lee Lewis que inspirou este tema dos 10cc é o single editado en 1958 "High School Confidential", un das mostras de rock and roll que ían marcar a toda unha xeración.

http://youtu.be/qNzEM-XwuiE

"The Dean and I" tamén fai unha referencia máis ou menos velada á versión que os Beach Boys fixeron da canción "Then He Kissed Me", canción escrita por Ellie Greenwich, Jeff Barry e o gran Phil Spector para The Crystals. A versión dos Beach Boys é de 1965 e aparece no álbum Summer Days (And Summer Nights!!), pero contén unha notable diferenza coa letra orixinal. A canción conta o momento en que un mozo bica a unha moza e está narrado dende o punto de vista dela. Non obstante, na versión dos Beach Boys a voz narrativa é a do mozo e por iso xa o título é diferente. Se a versión orixinal das Crystals se titula "Then He Kissed Me", a dos Beach Boys leva o título de "Then I Kissed Her", a mesma historia contada coa voz do outro personaxe protagonista.

http://youtu.be/z5aZeU0w9lM

E para que non quede atrás, a versión orixinal gravada por The Crystals en 1963, "Then He Kissed Me".

http://youtu.be/cE_jOD2Fxvs

You Are My Sunshine

Unha das cancións máis populares ó acabar a década dos anos 30 en Estados Unidos foi "You Are My Sunshine", un medio tempo que contou con dúas versións ese mesmo ano. Por regra xeral, atribúese a autoría desta canción a Jimmy Davies e Charles Mitchell, aínda que nos últimos anos xurdiron voces que cuestionan a Davies e a Mitchell coma os verdadeiros autores e non dubidan en sinalar a Oliver Hood, un dos membros de The Rice Brothers Gang, coma a pluma da que saíu esta canción.Con só un mes de diferenza, apareceron as dúas versión de "You Are My Sunshine", a primeira, a cargo de The Pine Ridge Boys. A segunda, a de The Rice Brothers Gang non conseguimos atopala na Rede.

http://youtu.be/gX_uKoWFs88

"You Are My Sunshine" conta con infinidade de versións dende entón. Pero tamén serviu para inspirar outras cancións. Talvez a máis coñecida sexa a dos Beach Boys "My Only Sunshine", pertencente a The Smile Sessions e que non aparecía na primeira edición de Smile Smile (1967).

http://youtu.be/V5T9FLdYz2Q

E nos últimos anos, "You Are My Sunshine" volveu revivir no comezo da canción de Glasvegas "Flowers and Football Tops" do disco éponimo dos escoceses publicado en 2009.

http://youtu.be/pg2Y4UMV5JQ

You Still Believe in Me

Con Pet Sounds, o álbum de maio de 1966, os Beach Boys confirmaban que eran algo máis ca unha banda para pórlle banda sonora a cada verán, con letras facilonas e ritmos pegadizos. E é que o grupo de Brian Wilson levaban algún tempo facendo unhas canción innovadoras polo seu son psicodélico, sempre combinado coas melodías vocais dos componentes. "You Still Believe in Me", o segundo corte do álbum, é un fermosa balada de apenas dous minutos e medio, que nos presenta a cara máis romántica dos mozos da praia, afastados desa imaxe característica que relaciona os Beach Boys coas praias californianas e o surf. Leva o selo de Brian Wilson, ó que axudou Tony Asher coas letras.

http://www.goear.com/listen/51b9dca/you-still-believe-in-me-the-beach-boys

Na mesma liña e con ecos de "You Still Believe in Me", Small Faces gravaron "Just Passing" na cara B do single "I Can't Make It", que publicaron en 1967. Tamén ten en común coa canción de The Beach Boys a súa brevidade.

http://youtu.be/3HNPTU61v9U

Sweet Little Sixteen

Apenas hai cancións de Chuck Berry que non fosen versionadas nalgunha ocasión. Posto que Berry é unha referencia indiscutible, o seu legado aínda pervive nas xeracións musicais posteriores que elevaron as súas creacións á categoría de imprescindibles. De feito, hai alguén no mundo que non recoñeza "Sweet Little Sixteen", single de 1958, aínda que sexa a través da melodía dun dos éxitos dos Beach Boys?

http://www.goear.com/listen/94fbd70/sweet-little-sixteen-chuck-berry

En 1963, os Beach Boys reciclaban a xenial canción de Chuck Berry cunha nova letra, pero coa mesma melodía para convertela nunha das cancións punteiras do surf rock que tantas alegrías lle ten dado á banda de Brian Wilson. "Surfin' USA" aparece no álbum do mesmo título, o segundo na conta dos californianos, que xa comezaban a exportar o seu estilo estival polo mundo.

http://www.goear.com/listen/510eaf8/surfin-usa-the-beach-boys

Ain't That Just Like a Woman

Alá por 1946 cando o rock 'n' roll non era máis que unha variante do blues, country e jazz, Louis Jordan, un compositor de Arkansas, gravou "Ain't That Just Like a Woman" xunto co seu grupo Louis Jordan and His Tympany Five, un tema cunha apertura que se habería de converter en todo un clásico ó reproducirse noutras cancións emblemáticas nos comezos do rock 'n' roll.

http://youtu.be/YEqiWTb-UWA

A primeira canción que reproduce a introdución de "Ain't That Just Like a Woman" é o clásico de Chuck Berry "Johnny B. Goode", de 1958. "Johnny B. Goode" é curiosamente unha das cancións máis versionadas da historia e mesmo a NASA a enviou ó espazo nunha cápsula xunto con outras pezas musicais como mostra do que se fai no planeta Terra.

http://www.goear.com/listen/bafb165/johnny-be-goode-chuck-berry

Outra canción mítica que empeza do mesmo xeito é "Fun Fun Fun", unha das máis divertidas de The Beach Boys, que a incluiron no álbum Shut Down Volume 2 (1964). Esta obra escrita por Brian Wilson e Mike Love tamén conta cun sinfín de versións coma a de Joan Jett, a de Status Quo e mesmo a de The Carpenters, sen esquecer a do grupo xuvenil mexicano Onda Vaselina, cuxa versión se trataba dunha adaptación libre ó castelán.

http://www.goear.com/listen/2d98f99/fun-fun-fun-the-beach-boys

California Girls

Agora que apreta o frío de decembro non vén nada mal retomar a música de The Beach Boys, que tanto nos recorda o verán. A banda californiana fundada por Brian Wilson e mailos seus irmáns Carl e Dennis xunto co seu curmán Mike Love e Al Jardine crearon un estilo propio a mediados 50 inspirado no surf e nas praias da Costa Oeste dos Estados Unidos con retrousos repetitivos e un ritmo elástico que non estaba exento de certa complexidade técnica. A música de The Beach Boys, banda sonora por excelencia do verán, é das máis influentes da época e mesmo os propios Beatles recoñeceron que Brian Wilson e compañía eran un dos seus referentes. "California Girls", do álbum Summer Days (And Summer Nights!!), de 1965 é unha das cancións máis celebradas.

http://www.goear.com/listen/d504442/california-girls-beach-boys

Unha das primeiras cancións que máis claramente se inspiraron en "California Girls", sobre todo na letra, é o éxito de Cheap Trick "Southern Girls" do álbum In Color (1977). A canción creada por Rick Nielsen, guitarrista de Cheap Trick e o baixista Tom Petersson remarca as ideas expresadas na canción dos Beach Boys.

http://www.goear.com/listen/19bef92/southern-girls-single-version-cheap-trick

Aínda que para versión de "California Girls", destaca a de David Lee Roth do EP de 1985 Crazy from the Heart. O integrante de Van Halen contou coa colaboración nos coros de Carl Wilson.

http://www.goear.com/listen/45b0f43/california-girls-david-lee-roth

Pero a polémica saltaría en 2010 co single de Katy Perry "California Gurls", do álbum Teenage Dream onde calca a letra en determinados momentos da canción. O feito de que no título Girls se escriba Gurls é unha consecuencia para evitar confusións co clásico dos Beach Boys.

http://www.goear.com/listen/6719da5/california-gurls-katy-perry