Amen

Os himnos gospel tradicionais tamén tiveron unha grande acollida na música popular, sobre todo a raíz das gravacións dos cantantes de soul e R&B, que non dubidaban en incluílas nos seus traballos discográficos. Polo tanto, a calquera que lle guste minimamente a música se lle ocorren un par de títulos. Un deles é con toda probabilidade "Amen", que The Impressions e Curtis Mayfield prepararon para a banda sonora da película de Sidney Poitier Lilies of the Field (1963). Malia que non era a primeira vez que se gravaba este himno, xa o fixeran the Wings Over Jordan Choir en 1948, a nova versión puxo en primeira liña a "Amen", grazas ó empuxe do cine, ademais da coidada produción e os arranxos que Jester Hairston fixo para a ocasión.

https://youtu.be/OjlHvTZq1E8

"Amen" contou con versións de artistas tan importantes coma Otis Redding, pero é a de The Winstons a que acadou maior notoriedade debido a secuencia de batería de G. C. Coleman. Rebautizada co título "Amen Break", editouse en 1969 e desde ese momento, son innumerables a de veces que outros músicos "tomaron prestada" esa secuencia, tanto que hai poucas semanas saíu unha sentenza na que se lle recoñece dereitos de "royalties" a G. C. Coleman polo uso indebido da súa creación. Aínda que se ten que pór no xulgado tódolos casos e acabasen por darlle a razón, faríase de ouro.

https://youtu.be/GxZuq57_bYM

Aquí van ó chou algúns exemplos recoñecidos que se aproveitaron en algunnha medida do "Amen Break". Son cancións que saíron no mesmo ano, o que dá idea do tirón da secuencia. A primeira é o "Firestarter" de The Prodigy, do álbum The Fat of the Land (1997).

https://youtu.be/WW6-b5nNb9U

Cando saíu o álbum de The Prodigy a crítica viu un achegamentoa música de Nine Inch Nails, o que non deixa de ser verdade, pois a banda de Liam Howlett ten en común coa de Trent Reznor o mesmo gusto por "Amen Break", como se pode apreciar en "The Perfect Drug", canción da banda sonora da película Lost Highway (1997).

https://youtu.be/c-QnnLudkQA

E como non podía ser doutro modo, Oasis non podían quedar atrás e tomaron algunha parte en "D'You Know What I Mean", single co que os Gallagher presentaban Be Here Now (1997).

https://youtu.be/GjwRIjrC4io

Very Ape

Nirvana aínda non dixerira de todo o inmenso éxito que acadara Nevermind (1991) cando a banda de Kurt Kobain publicou In Utero (1993), unha continuación do son grunge que Nirvana levaba desenvolvendo desde as súas orixes e que tan bo resultado lle dera. A diferenza de Nevermind, In Utero non contén un trallazo tan claro como era o caso de "Smells Like a Teen Spirit", capaz de xustificar por si só todo un álbum, pero por outra parte gaña en consistencia e equilibrio, posto que non hai unha canción que destaque por riba das outras. Seica a banda non quedou moi contenta co traballo do produtor Steve Albini, que fora o elixido para ese álbum en detrimento de Butch Vig, e Nirvana tivo que recorrer ó produtor habitual de REM, Scott Litt,  para que fixese algunhas lixeiras modificacións no son dos singles. "Very Ape" é unha das cancións do álbum.

https://youtu.be/91yrS5PUJBY

The Prodigy baseouse en "Very Ape" para os acordes de "Voodoo People", canción incluída no álbum Music for the Jilted Generation (1994)

https://youtu.be/-Fz85FE0KtQ

Love Buzz

A finais dos anos 60 cando o flowerpower estaba no seu máximo apoxeo e a psicodelia dominaba o rock, os neerlandeses Shocking Blue colaron as súas cancións nas listas de vendas internacionais, marcadas sobre todo por grupos e artistas británicos e estadounidenses. Pero a súa maneira de facer música, unido á voz envolvente de Mariska Veres e ás letras de Robbie van Leeuwen situáronos nun lugar privilexiado que lles gardaría un lugar na historia. Con "Love Buzz", unha das primeiras cancións que sacaron e que pertence ó disco At Home (1969) conseguiron á entrada ó Olimpo da música.

http://youtu.be/JAvYUFcRnO4

Esta canción está ligada de forma especial ós comezos dunha das bandas míticas dos anos 90. Como non, falamos de Nirvana. En 1988, cando a banda de Seattle liderada por Kurt Cobain sacaron o seu primeiro disco Bleach, incluíron unha versión espectacular da canción de Shocking Blue, que ademais foi lanzada como single de presentación.

http://youtu.be/ZLthJDXbq6Y

Pero a historia de "Love Buzz" chega á primeira década deste século XX. En 2004 The Prodigy emprega un sample para a canción "Phoenix", do álbum Always Outnumbered, Never Outgunned.

http://youtu.be/K__4dqclnGk

The Prodigy non haberían de ser os últimos en empregar "Love Buzz" para as súas cancións. Lil' Kim recorre á canción de Shocking Blue no seu "Kitty Box", do álbum The Naked Truth (2005).

http://youtu.be/XscrEwLtUJE

You Need Love

Willie Dixon, un afamado compositor dos anos 60, escribiu "You Need Love", unha marabillosa canción que lle entregou a Muddy Waters, un consagrado cantante de blues que a gravou en 1962 e publicouna como cara B do seu single "You Shook Me".

 http://www.goear.com/listen/0208835/you-need-love-muddy-waters

A primeira versión que se ten deste tema débese á banda inglesa Small Faces, que a gravaron co título de "You Need Loving" para o seu álbum homónimo e de debut de 1966.

  http://www.goear.com/listen/90bae80/you-need-loving-small-faces

Pero o encanto da música de Muddy Waters non só atrapou a Small Faces, senón que un dos grandes grupos de rock de tódolos tempos, Led Zeppelin, ía tomalo como un dos seus referentes principais, de tal xeito que Robert Plant, que estaba prendado da versión orixinal de Waters, compuxo "Whole Lotta Love" xunto co resto dos seus compañeiros para o álbum Led Zeppelin II (1969).

 http://www.goear.com/listen/37b003d/whole-lotta-love-led-zeppelin

Malia ás acusacións de plaxio que anos máis tarde ensombrecerían a canción de Led Zeppelin, "Whole Lotta Love" foi todo un éxito que fixo esquecer tanto a versión de Waters coma a de Small Faces e, unha vez máis, proba disto é a enorme cantidade de versións que se fixeron do tema de Led Zeppelin. Unha das últimas máis populares da man de Carlos Santana en 2010. Pero á marxe dos covers, "Whole Lotta Love" tamén serviu de sample para outras cancións. Quen lle ía dicir a Willie Dixon que a súa primitiva creación ía inspirar a tantos grupos. Como exemplo, deixámosvos un deses samples, concretamente a canción de  The Prodigy "Rhythm Of Life", que apareceu na cara B do single "One Love", presentación do seu segundo álbum de estudio Music for the Jilted Generation (1994).

 http://youtu.be/0KUG8LGkvpE