Los rockeros van al infierno

Cando a globalización aínda non acadara os niveis que se observan agora, a banda madrileña Barón Rojo editou dúas versións do seu segundo álbum Volumen brutal (1982), unha en castelán e outra en inglés pensada para o mercado internacional. Gravado no estudio de Ian Gillan, líder de Deep Purple, tivo unha moi boa acollida nas súas dúas versións e hoxe está considerado como un dos mellores discos de heavy metal do panorama español. Unha das súas cancións estrela é "Los rockeros van al infierno", auténtico himno heavy composto por José Luis Campuzano e Carolina Cortés, que xa forma parte de toda unha xeración. 

https://youtu.be/9og-k5pBe4Y

Ben é verdade que non sempre as adaptacións non sempre obteñen o resultado que se espera, pero no caso de Volumen brutal saíu ben. A versión en inglés de "Los rockeros van al infierno" titulouse "Rockers Go to Hell". Non esquezamos que non hai moito Barón Rojo verteu ó castelán o álbum completo de The Who Tommy de maneira brillante.

https://youtu.be/39GILx56cV8

Move Over

Janis Joplin estaba chamada a ocupar o trono que deixou Billie Holiday no blues e demostrou na súa curta carreira que non só aceptaba ese reto, senón que tamén estaba disposta a ir un paso máis aló, nun momento fundamental para a música como foron os anos 60. Cun destino marcado polas drogas ó igual que a gran dama do blues, Janis Joplin condensou nos seus catro discos editados, así como nas súas actuacións en directo rock, soul, blues, country e folk cunha enerxía e unha sensibilidade que ía deixar unha fonda marca en moitos artistas, tanto nos coetaneos que coincidiron con ela nos escenarios dos festivais, coma nos que viñeron detrás. Pearl, o seu último traballo, foi publicado en 1971 tres meses despois do falecemento de Janis Joplin e é unha verdadeira xoia. Ábrese con"Move Over", un tema que leva a sinatura da artista texana.

http://www.goear.com/listen/eefb741/move-over-janis-joplin

Versionada por un sinfín de artistas de todos os estilos, a música de Janis Joplin non foi indiferente tampouco ás bandas de heavy métal. Barón Rojo animáronse a versionar "Move Over" no seu álbum de versións Perversiones (2003) dándolle o seu toque heavy.

http://youtu.be/96U5elKXgm8

Go to the Mirror!

En plena expansión do rock a finais dos 60, as bandas máis innovadoras comezaron a xogar con xéneros tan clásicos como a ópera e así xurdiu un novo formato: a ópera rock, onde o son dos violíns e dos trombóns se trocaron polo das guitarras e dos baixos. The Who foron dos primeiros en explotar esta opción cun álbum conceptual titulado Tommy en 1969, que seguía os patróns da ópera: unha narración, pero esta vez contada en dezasete cancións, que se acabou traducindo en dúas versións sinfónicas en 1971 e1972; e nunha película en 1975. A experencia foi tan positiva para Pete Townshend que repetiu a idea en Quadrophenia, álbum de 1973. "Go to the Mirror!" é o corte 5.

http://www.goear.com/listen/2383c78/14-go-to-the-mirror-the-who

Pois resulta que Tommy está máis de moda ca nunca, alomenos no panorama rock español. E é que hoxe ponse á venda o novo álbum de Barón Rojo, Tommy Barón, o tributo que a mítica banda de heavy metal lle fai ó álbum de The Who. Barón Rojo verteu tódalas cancións ó castelán cun resultado excelente como ben se pode apreciar no adianto "Hacia el Espejo".

http://youtu.be/-6o18FXXUtw