By the Time I Get to Phoenix

Outro músico estadounidense que dende os anos cincuenta contribuíu ó espallamento do rock and roll e outros estilos afíns é Johnny Rivers. Este cantante nacido en Nova York hai 72 anos, combinou durante a súa carreira as cancións propias e outras que lle ofreceron varios compositores xunto con versións de temas moi coñecidos. No terceiro álbum, Changes (1966), incluíu unha balada escrita por Jimmy Webb titulada "By the Time I Get to Phoenix", que sacara como single un ano antes, ó tempo que a gravaba o cantante country Glen Campbell, cuxa versión saíu uns meses despois. Malia que ambas versións son moi semellantes entre si e apenas se diferencian, a de Glen Campbell tivo maior repercusión.

https://youtu.be/qJp-5aDZ0V0

Pero a gran versión que se fixo de "By the Time I Get to Phoenix" correspóndelle a Isaac Hayes, no álbum Hot Buttered Soul (1969). O ritmo da cancións adáptase á perfección ó estilo sobrio de Hayes, quen a alonga ata os 18:42 de duración. Neste caso, optamos por ofrecervos unha versión reducida.

https://youtu.be/AEVDoAasepg

Que a versión de Hayes é desas que eclipsa mesmo á orixinal é algo que se aprecia na influencia que exerce nalgúns grupos de R&B. A canción de Tony! Toni! Toné! "Anniversary", do álbum Sons of Soul (1993), sen ser un remedo de "By the Time I Get to Phoenix", inspírase na versión de Hayes ó tentar reproducir algúns dos efectos desta.

https://youtu.be/aLc1mZF_LYg

Xa remitíndose claramente ó "By the Time I Get to Phoenix" de Hayes, a canción pop de Brídín Brennan "You Can't Hurt Me", do álbum Eyes of Innocence (2005), si colle directamente algúns elementos do tema escrito por Webb.

https://youtu.be/odSqxCrf6AY

Leavin'

Tony! Toni! Toné!, o grupo no que Raphael Saadiq medrou como artista, consagrouse co terceiro álbum, Sons of Soul (1993), onde deixaban claro desde o título as influencias e o son que conformaba a súa música. O álbum é un conxunto de cancións soul e funk con ecos claros dos anos 60 e 70 cando as discográficas Stax e Tamla Motown dominaban o mercado do soul. O segundo single, "Leavin'", reproduce ben as referencias máis directas das que bebe a música de Tony! Toni! Toné! centrándose especialmente no estilo que Smoke Robinson lle imprimiu á obra de seu con The Miracles e que logo lle transmitiu a The Temptations. Pero ademais, tamén miran cara a unha das bandas máis importantesdo hip hop dos 80, A Tribe Called Quest, o que fai de "Leavin'" unha das cancións máis variadas no repertorio de Tony! Toni! Toné!.

http://youtu.be/hslicRJIoeg

"Leavin'" ten ecos de "I Second That Emotion", tema que Smoke Robinson gravou con The Miracles no recompilatorio Greatest Hits, Vol. 2 (1968).

http://youtu.be/mv9cWgkpIZ4

Pero o son de "Leavin'" débelle moito ó tema de A Tribe Called Quest "If the Papes Comes", da banda sonora da película Mi vida loca (1990), xa que toman un sample para completar "Leavin'".

http://youtu.be/ToP956kCeA4

Ask of You

Posiblemente se as tendencias que dominan a música actual non cambian, e todo parece indicar que se van manter así durante moito tempo, o soul xa nunca volverá a vivir unha época de esplendor como a que tivo durante os anos 60 e 70 cando a Motown e Stax non paraban de amosar novos talentos que enriquecían os catálogos das tendas da música. Menos mal que de vez en cando xorde un novo artista que devolve á memoria a aqueles anos de gloria. A mediados dos 90 facía o seu debut en solitario o líder da formación Tony! Toni! Toné!, Raphael Saadiq, aínda que de foma moi modesta e nin sequera cun álbum propio. Trátase dunha soa canción, "Ask of You", que Saadiq achegou á banda sonora da película Higher Learning (1995). Daquela, Raphael Saadiq aínda non devecía por emprender unha andaina en solitario e continuou uns anos máis co seu grupo, pero xa en "Ask of You" se pode apreciar que como artista en solitario non tiña nada que perder.

http://youtu.be/jCn1vIf6yIk

En 1999, xusto cando deu por rematada a súa aventura con Tony! Toni! Toné!, Raphael Saadiq embarcouse nun supergrupo de R&B chamado Lucy Pearl, unha continuación do proxecto The Ummah, co que Saadiq e os restantes membros de Lucy Pearl xa tiveran un primeiro contacto. Unha das cancións máis destacadas de Lucy Pearl é "Lucy Pearl's Way", do disco epónimo de 2000, na que Raphael Saadiq reinventa "Ask of You".

http://youtu.be/Ddt5tCQoKiE