Save the last dance for me

The Drifters foi un dos grupos de doo-wop e soul máis influíntes de todos os tempos. Malia os continuos cambios que se producían na formación, deixaron para o recordo unha manchea de boas cancións que cada certo tempo volven ó panorama actual da man de novas voces. Quizais o período de máis esplendor que viviu este conxunto foi cando contaba entre os seus membros co gran Ben E. King, quen logo habería ter unha prolífica carreira en solitario. Mentres pertencía ó plantel dos Drifters, Ben E. King gravou algúns traballos con eles, como o terceiro álbum de longa duración do grupo, nomeado  Save the last dance for me (1962). A canción que lle dá título é unha das  máis concorridas por artistas de  tódolos artistas e mesmo, Ben E. King a gravou no seu álbum de 1987, que tamén ten o mesmo nome que a canción. O single publicouse en agosto de 1960, dous anos antes de que aparecese recollido no álbum.

https://youtu.be/n-XQ26KePUQ

Unha das primeiras versións que se fixeron foi a de Dalida, quen a cantou en francés co título de "Garde moi la dernière danse" e que se incluíu no álbum do mesmo nome de 1961.

https://youtu.be/aGSc4kmvj4Y

A influencia desta canción de The Drifters pode atoparse nos primeiros acordes da canción de Nino Bravo "Tú cambirarás", primeiro corte do álbum Te quiero, te quiero (1970).

 https://youtu.be/RdrByRj72s8

Tampouco está nada mal a versión de "Save the last dance for me" de Nancy Sinatra e Lee Hazelwood no álbum que ámbolos dous gravaron chamado. Nancy & Lee (2004).

 https://youtu.be/zvfnG_Vs5yE

Something Stupid

A Carson Parks non lle ía demasiado ben a súa aventura na música a comezos dos sesenta. Pasou por unhas poucas bandas, intentou facer un dúo co seu irmán e tamén probou en solitario, pero de ningunha desas maneiras acababa por conseguir unha ansiada estabilidade. Ó pouco de casar con Gaile Foote, Parks preparou as cancións precisas para compór un álbum e gravounas coa súa dona, baixo o nome artístico Carson & Gaile. Así, en 1966 vía a luz San Antonio Rose, o traballado disco do matrimonio. En realidade, San Antonio Rose non contén ninguha canción memorable, pero unha delas, "Something Stupid", chamou a atención de Frank Sinatra, que non tardou moito en gravala acompañado da súa filla Nancy.

https://youtu.be/9yZycTxjoIQ

A versión de Frank Sinatra e de Nancy, publicada no álbum The World Knew (1967), acaparou unha enorme popularidade borrando case por completo a versión orixinal de Carson e Gaile. Certo é que anos despois, Robbie Williams decidiu facer unha nova versión ó lado da actriz Nicole Kidman, tamén moi exitosa, pero que apenas achega nada novo á da familia Sinatra.

https://youtu.be/6-zSsw0LQMw

Resulta curioso como ás veces as escalas melódicas unen cancións de estilos totalmente diferentes. A canción de The Replacements "Swinging Party", pertencente a Tim (1985), contén certas reminiscencias de "Something Stupid" nalgún dos tramos da canción.

https://youtu.be/cbhQKffugNk

O parecido é máis evidente, se cabe, na versión que Lorde realizou de "Swinging Party" en 2013, na cara B do single "Tennis Court".

https://youtu.be/1wavwT7paPs

You Only Twice

A banda sonora das películas de James Bond forma un dos capítulos máis destacados da historia da música contemporánea. John Barry, compositor e produtor das primeiras películas da serie, as que conseguiron que o axente 007 se convertese nun dos mito do cine comercial, dotou cada un dos temas dun son persoal que se fixo característico das historias do personaxe creado por Ian Fleming e que todos os que o relevaron tratan de manter para que a banda sonora se siga identificando con James Bond. Unha das creacións máis aplaudidas de Barry foi "You Only Live Twice" para a película do mesmo título de 1967. O tema central está interpretado por Nancy Sinatra.

https://youtu.be/XgFtQPgHyek

Os acordes de "You Only Twice" son moi fáciles de identificar e inspiraron a outros artistas que os aproveitaron para os seus propios temas. O máis significativo é o de Robbie Williams, que homenaxeou a música de Barry con "Millennium", single de presentación de I've Been Expecting You (1998), aínda que máis ben case se pode dicir que é unha versión cunha letra diferente.

https://youtu.be/xcWOviMI6Lk

Co son algo máis disfrazado pero coa influencia inconfundible de Barry, Cee-Lo Green tamén recorre o son de James Bond en "Bright Light Bigger City", pertencente a The Lady Killer (2010).

https://youtu.be/R-JE5be7OA4

Don't Let Him Waste Your Time

Pulp gañou unha boa reputación durante o tempo que esta banda estivo en activo, en plena febre do britpop. Por iso, a Jarvis Cocker, o líder e tamén o principal compositor, non lle faltou traballo cando no ano 2003 a banda decidiu tomar un longo período de descanso, e seguiu compondo cancións, aínda que meirande parte delas cedíallas a outros artistas antes de probar sorte en solitario. Unha das afortunadas foi Nancy Sinatra, que no álbum epónimo que publicou en 2004 contou cunha canción de Jarvis Cocker, que ademais tamén participaba como músico encargándose da percusión e da produción. Trátase de "Don't Let Him Waste Your Time" e esta contribución de Cocker brilla nun álbum cheo de cancións de destacados compositores e músicos coma Morrisey, Bono e The Edge de U2, Thurston Moore de Sonic Youth e Steven Van Zandt.

http://youtu.be/judh99G3-rs

Dous anos despois, aparecía por fin o primeiro disco en solitario de Jarvis Cocker. En Jarvis (2006) o líder de Pulp contou coa colaboración dalgún dos membros da banda coma  Richard Hawley, Steve Mackey e Mark Webber. A canción estrela foi a nova versión de "Don't Let Him Waste Your Time".

http://youtu.be/MX99zjDK-vo