Alan Merrill, Jake Hooker e Paul Varley, os integrantes de Arrows, non estiveron demasiado tempo xuntos, pero posiblemente os catro anos escasos que durou Arrows foron os máis intensos das súas vidas. Durante ese breve período de tempo deixaron para o recordo unha pequena colección de singles, boa mostra do pop e do rock de mediados dos anos 70. Mais por esas ironías da vida, a súa canción máis importante "I Love Rock 'n' Roll" hoxe atribúese a Joan Jett, que fixo unha espectacular versión que eclipsou ós autores orixinais.
A ex componente de The Runaways, Joan Jett gravou unha versión coa súa formación Joan Jett & The Blackhearts no seu segundo álbum I Love Rock 'n' Roll (1981) cun éxito rotundo que acabou por borrar a versión orixinal de Arrows da memoria colectiva.
A partir da sona que colleu a versión de Joan Jett, outros artistas comezaron a facer as súas propias versións. Aerolíneas Federales adaptárona ó castelán no seu cuarto disco Échame Sifón (1989) como "Quiero Rock 'n' Roll".
O grupo prefabricado Five sampleou o tema de Alan Merrill en "Everybody Get Up" no seu álbum de debut en 1998.
Ningún comentario:
Publicar un comentario