My Iron Lung

A mediados dos anos 90, Radiohead xa chamaba a atención polas súas propostas innovadoras de son. Cunhas letras coidadas a cargo sobre todo de Thom Yorke, o seu álbum de debut Pablo Honey (1993) foi unha agradable sorpresa no panorama musical e esa sensación acabaría por confirmarse en 1994 coa publicación do EP My Iron Lung e ó ano seguinte co segundo disco The Bends. My Iron Lung contén varias caras B de Pablo Honey e entre elas destaca a canción que lle dá título ó EP, e que posteriormente tamén incluíron en The Bends.

 http://www.goear.com/listen/008c961/my-iron-lung-radiohead

En 2008 a maltreita escena musical española recibiu coma un sopro de aire fresco a publicación do álbum de debut da banda madrileña Vetusta Morla. Un Día en el Mundo, producido e autoeditado polos rapaces de Vetusta Morla despois de ser rexeitados por varias compañías discográficas, contén algúns tesouros que xa foran aparecendo previamente en maquetas e en EPs.  A irrupción do éxito de Vetusta Morla fixo que se volvese a vista cara os circuitos de música independente, tan invisibles normalmente para un amplo sector do público, cando normalmente é aí onde se ofrecen traballos dunha maior calidade artística. Grupos como Lori Meyers, Standstill, We Are Standard, Love of Lesbian, Astrud e os propios Vetusta Morla representan hoxe en día o mellorciño do pop-rock en España.

Sinalouse que a canción que lle dá título ó disco é a que mellor recolle a influencia de Radiohead nesta banda. Esperamos que vos guste.

  http://www.goear.com/listen/1c0894a/un-dia-en-el-mundo-vetusta-morla

Vetusta Morla tamén gravou unha versión acústica que bautizaron como "Otro Día en el Mundo": http://youtu.be/9K5UrzaKgaY