New York, New York

A canción de Jay Z "Empire State of Mind" que viamos na entrada anterior está dedicada a Nova York, posiblemente a cidade máis cosmopolita do mundo, pero nin moito menos é a única canción que se escribiu sobre a cidade dos rañaceos, xa que esta inspirou dende moi cedo a músicos e compositores; así que imos  repasar algunhas destas cancións que homenaxean a Nova York.

A primeira delas é o todo un himno por excelencia e tamén a banda sonora cando se fala desa fantástica cidade. Un clásico con maiúsculas a cargo de Frank Sinatra. "New York, New York" aparecía na película do mesmo nome de Martin Scorsesse de 1977 cantada por Liza Minelli, pero gañou fama coa versión de Sinatra de 1980 Trilogy: Past Present Future.

 http://www.goear.com/listen/f749705/new-york-new-york-frank-sinatra

A seguinte que vos presentamos é a de Ryan Adams. O compositor canadense tamén titulou así a un tema que aparecía no seu segundo traballo Gold (2001).

 http://www.goear.com/listen/9fba2d9/new-york-new-york-ryan-adams

Como non podía ser menos, o neoiorquino Moby tamén lle rendía tributo á súa cidade no disco recompilatorio Go. The Very Best of Moby (2006) acompañado doutra célebre veciña de Nova York, Debbie Harry.

 http://www.goear.com/listen/0498e30/new-york-new-york-moby

A británica Paloma Faith tamén facía o seu debut cunha homenaxe a Nova York con "New York" en Do You Want the Truth or Something Beautiful? (2009) cun sensacional coro gospel.

 http://www.goear.com/listen/bcfb4e5/new-york-paloma-faith

Outras canción, no entanto, ambientan as súas historias en Nova York dándolle total protagonismo á cidade. Por exemplo, o tema de Sting "Englishman in New York", un tema moi sampleado posteriormente e que está no seu segundo álbum en solitario ...Nothing Like the Sun (1987).

 http://www.goear.com/listen/c08baa7/englishman-in-new-york-sting

En España, Los Rebeldes gravaron "Un Español en Nueva York" no seu álbum Más Allá del Bien y del Mal (1988).

 http://www.goear.com/listen/855eb19/un-espaaol-en-nueva-york-los-rebeldes

Ese mesmo ano, Mecano publicaba Descanso Dominical onde unha das súas cancións máis aclamadas é "No Hay Marcha en Nueva York", unha hilarante historia asinada por José María Cano.

 http://www.goear.com/listen/c32bb59/no-hay-marcha-en-nueva-york-mecano

 Pet Shop Boys  tamén homenaxearon a esta cidade con "New York City Boy" do álbum de 1999 Nightlife.

 http://www.goear.com/listen/8976c60/new-york-city-boy-pet-shop-boys

E xa para rematar, deixámosvos co tema de REM "Leaving New York" do álbum Around the Sun (2004).

 http://www.goear.com/listen/d4b51b1/leaving-new-york-rem

Love on a Two-Way Street

Sylvia Robinson e Bert Keyes compuxeron en 1968 unha das baladas soul máis recoñecidas de todos os tempos "Love on a Two-Way Street". Sylvia era co-propietaria da discográfica All Platinum e ofreceulle esta canción a unha das súass artistas, Lezli Valentine, que foi a primeira en gravala.

 http://youtu.be/_nOajAt7LSE

Pero a fama viría coa versión que fixeron The Moments, tamén coñecidos comoRay, Goodman & Brown, un grupo de R&B que a publicou en 1970 no seu disco Not on the Outside, But on the Inside, Strong!

 http://youtu.be/JhtL6h9xqso

Outras dúas versións destacadas son a de Stacy Lattisaw en 1981 e a de Gloria Estefan en 1994, mais imos quedar con algunhas cancións que a empregaron como sample. A primeira delas é a do canadense Caribou no seu tema "Subotnik" do álbum The Milk of Human Kindness (2005).

 http://youtu.be/ad28jmJ8bUw

No entanto, a canción que máis repercusión tivo nos últimos anos é a do rapeiro Jay-Z que, en colaboración con Alicia Keys, creou "Empire State of Mind", toda unha homenaxe á cidade de Nova York, no álbum The Blueprint 3 (2009).

 http://www.goear.com/listen/91b3242/empire-state-of-mind-jay-z-feat-alicia-keys

Lucy in the Sky with Diamonds

É moi complicado quedar só cunha canción do excelente Sgt. Pepper's Lonely Hearts Club Band, o disco antolóxico dos Beatles de 1967 e que supuxo a culminación dun proceso que se vislumbraba dende Revolver e que converteu ós de Liverpool en algo máis que outra banda de pop rock británica á cabeza das listas de éxito en todo o mundo. "Lucy in the Sky with Diamonds", o terceiro corte do álbum, compúxoa John Lennon despois de ver un debuxo do seu fillo Julian que mostraba á súa amiga Lucy entre diamantes. Con todo, ó publicaren ó disco en plena efervescencia da psicodelia, moitos malpensados creron que as iniciais do título da canción facía referencia ó LSD e polo tanto era unha apoloxía das drogas; unha lenda máis que envolve todo o relacionado con The Beatles.

 http://www.goear.com/listen/1880dcf/lucy-in-the-sky-with-diamonds-the-beatles

A maioría das versións que se fixeron deste tema aparecen en recompilatorios dedicados a The Beatles, pero  un dos primeiros que se animou a gravar "Lucy in the Sky with Diamonds" foi Elton John en 1974.

 http://www.goear.com/listen/5e3b0eb/lucy-in-the-sky-with-diamonds-elton-john

Mesmo Pink Floyd fixo unha referencia a esta canción de The Beatles no single "Let There Be More Light" do álbum A Saucerful of Secrets (1968).

http://www.goear.com/listen/43cff04/let-there-be-more-light-pink-floyd

E antes de seguir con "Lucy in the Sky with Diamonds", cómpre indicar que a canción de Pink Floyd sentou a base para un dos éxitos de Placebo. Concretamente, "Taste in Men", do álbum Black Market Music (2000).

http://www.goear.com/listen/1765b36/taste-in-men-placebo

"Lucy in the Sky with Diamonds" tamén está na base doutras cancións que irremediablemente lembran a orixinal. É o caso de Hyde, cantante xaponés que en 2003 publicou o seu segundo álbum 666 onde está incluído "Horizon".

 http://www.goear.com/listen/385847a/horizon-hyde

Everybody Wants to Rule the World

A nova ola británica de comezos dos anos 80 deixounos bandas realmente impresionantes cun son innovador capaz de perpetuarse no tempo. Tears for Fears, a banda de Roland Orzabal e Curt Smith, foi unha delas, xa que non se entendería a música dos 80 sen cancións tan boas como "Shout" e este fantástico "Everybody Wants to Rule the World", quizais o mellor tema de todos. Está incluído no segundo disco de Tears for Fears Songs from the Big Chair (1985).

 http://www.goear.com/listen/8642b1c/everybody-wants-to-rule-the-world-tears-for-fears

A década de 1990 foi a da eclosión das chamadas boy bands, grupos de rapaces guapos que cantaban cun son totalmente prefabricado onde a música é case o de menos; e se ben as orixes deste fenómeno pódense situar á par do comezo do pop, é nesta década cando o seu poder na música se volve máis forte, grazas sobre todo ó éxito que tiveron a finais dos 80 New Kids on the Block e posteriormente Take That e Backstreet Boys. En tódolos países as discográficas buscaron grupos máis ou menos parecidos a estes últimos que tiveron  o seu momento de gloria, aínda que, como era de esperar, foron totalmente efémeros. España non se librou disto e a mediados de década apareceron Buen Color e Providence, bandas das que hoxe ninguén se acorda. Non obstante, Providence debutaron co single "Sigue Así", claramente inspirado no tema de Tears for Fears, recollido no seu disco Providence de 1997.

  http://youtu.be/1neP4swx7i0

Imposible non facerse eco da extraordinaria versión que Lorde fixo de "Everybody Wants to Rule the World" en 2014 para a banda sonora da película Os Xogos da Fame.

https://youtu.be/DaVA6sgOpws

The Bug

En 1991 publicábase o derradeiro álbum de estudio dunha banda mítica que dende 1977 impregnou coas súas guitarras e o carisma do seu líder Mark Knopffler a escena rock mundial. Malia que Dire Straits seguirían publicando recompilatorios desde entón, pódese dicir que tras apostar forte pola  carreira en solitario de Knopffler en 1996 é difícil crer na posibilidade de que Dire Straits volvan con material novo. De tódolos xeitos, On Every Street (1991) foi todo un éxito con trallazos como "Calling Elvis" e este "The Bug", unha das cancións máis optimistas da banda e que hoxe che traemos por aquí. Un gran álbum que achegou a Dire Straits a un público novo que puido descubrir unha traxectoria dunha das bandas máis grandes de Gran Bretaña.

 http://www.goear.com/listen/2dd839c/the-bug-dire-straits

Tan só un ano despois da súa publicación, a cantautora Mary Chapin Carpenter fixo unha notable versión de "The Bug" e que publicaría o seu disco de 1993 Come On, Come On.

  http://youtu.be/q_rbjg2k6cI

I Got a Name

Jim Croce non tivo unha carreira moi longa. Por desgraza, a súa morte, en estrañas circunstancias, privounos dun compositor que lograra facerse un oco no panorama musical americano entre os anos 60 e 70 en plena efervescencia da música pop e rock e que a traxedia levou por diante como a outros  artistas tan novos coma Janis Joplin, Jimi Hendrix e Jim Morrison, entre outros. En decembro de 1973 publicábase o seu disco póstumo I Got a Name, tan só tres meses despois do seu pasamento e que sería o quinto na traxectoria deste cantautor que nos deixou con só trinta anos. Nese álbum a canción que lle dá título contén un riff que haberíamos de encontrar posteriormente.

 http://www.goear.com/listen/a3c857f/i-got-a-name-jim-croce

E sería vinte anos despois, en 1994, cando o grunge estaba no seu apoxeo. A banda de San Diego, Stone Temple Pilots, liderada por Scott Weiland, publicaba o seu  segundo disco Purple que os catapultaría á fama en todo o planeta, grazas a cancións como "Interstate Love Song", o segundo single, onde moitos viron que o riff de guitarra que se empregaba neste tema era moi semellante ó de Jim Croce. En calquera caso, coma sempre, sexa cal sexa o grao de semellanza, podemos desfrutar de dúas boas cancións.

 http://www.goear.com/listen/8f1fc83/interstate-love-song-stone-temple-pilots

Thunder Road

O terceiro disco do gran Bruce Springsteen, Born to Run (1975) está considerado un dos grandes na carreira do compositor de Nova Jersey e polo tanto,  non cómpre dicir que para calquera artista admirador do Boss este supón toda unha fonte de influencia, dende a primeira canción ata a última, malia a que só contén oito cancións, todas elas coa esencia da música de Springsteen e a E Street Band.  Born to Run ábrese con este delicioso "Thunder Road", un dos temas máis versionados.

 http://www.goear.com/listen/4fcb8f2/thunder-road-bruce-springsteen

Un dos discos onde máis se nota a presenza de Bruce Springsteen é no segundo de The Killers. A banda de Brandon Flowers acababa de conseguir situarse no mapa musical cun excelente debut Hot Fuss (2004) e para o seu segundo traballo necesitaban confirmar as expectativas que se levantaran en torno a eles. Así que dous anos despois vía a luz Sam's Town, un álbum que se podería calificar de rock clásico, debido as influencias de Springsteen e U2."When You Were Young", o single de lanzamento, parece unha canción asinada por Springsteen que podería pertencer tranquilamente a Born to Run. Mentres agardamos un novo traballo de The Killer tras os discos en solitario de Brandon Flowers e de Ronnie Vannucci, quedamos con un dos seus mellores temas.

 http://www.goear.com/listen/ba6e7b1/when-you-were-young-the-killers

Chicago

O cantautor americano procedente de Michigan Sufjan Stevens forma parte da nova marea de autores que encabezan a nova xeración folk con aires indies e sen deixar de lado á electrónica. Comezou a súa carreira en 2000 e cinco anos despois xa tiña no mercado o seu quinto disco titulado Illinois, (2005) onde se atopa esta fantástica canción "Chicago".

 http://www.goear.com/listen/ce4f4a1/chicago-sufjan-stevens

Malia a que as cancións de Sufjans Stevens aínda non contan con versións relevantes, Vetusta Morla e Christina Rosenvinge animáronse a gravar "Chicago" para conmemorar o Día da Música en 2009 por iniciativa do xornal El País, que ese ano publicaba unha serie de revisión de cancións interpretadas por artistas alternativos.

http://www.goear.com/listen/5a4839c/chicago-vetusta-morla-and-christina-rosenvinge