Mi Rendición

A traxectoria de Carlos Goñi no panorama musical español remóntase os anos 80 cando o músico valenciano puxo en marcha Comité Cisne, un interesante proxecto cuxa música estaba bastante influída polo son de The Velvet Underground e de Lou Reed, do que mesmo chegaron a publicar un EP con tres temas seus. Non obstante, o gran público chegou a coñecer a Goñi grazas ó seu seguinte proxecto, Revólver, que mesturaba pop e rock sen renunciar á calidade. Coñecido por ser o Springsteen español, a finais de 1996 editou Calle Mayor, un dos mellores discos de Revólver. O single de lanzamento foi "Mi Rendición", unha das cancións con máis forza deste excelente álbum.

http://www.goear.com/listen/f8e46ae/mi-rendicion-revolver

Unha banda que leva pouco tempo rodando polos escenarios do país, pero con integrantes bastante experimentados no mundo da música é El Olvido de Marilyn. Este grupo granadino formado polos irmáns Jorge e Javier Salas e por Nacho Velázquez e Gustavo debutaron en 2011 co álbum Laberinto de Emociones, pero nos seus concertos de vez en cambio sorprenden cunha versión acústica de "Mi Rendición", o que lles serve para gañar novos adeptos.

http://www.goear.com/listen/5cdf19f/mi-rendiciasup3n-el-olvido-de-marilyn

Suspicious Minds

As obrigas como cidadán americano non liberaron a Elvis Presley de facer o servizo militar cando estaba no cumio da súa carreira e xa rexentaba o título indiscutible de rey do rock. A chamada a filas podía considerarse como un contratempo para os seus seguidores, ávidos de novas cancións de rock and roll, pero o seu mánager Colonel Tom Parker aproveitou para ensalzar aínda máis a imaxe do seu protexido; mesmo algúen tan importante como Elvis non renunciaba ó cumprimento do deber. Iso ocorreu en 1958 e cando Elvis volveu da mili uns anos despois, a música xa non xiraba en torno á figura do Rey. Así que en 1968 Elvis Presley instalouse en Las Vegas onde lle garantiron actuacións case diarias mentres tentaba remontar a súa carreira, que xa afastada do rockabilly, orientouse cara o pop e o soul. En 1969, sacou un dos singles máis impactantes que se lle recordan, unha fermosa balada chamada "Suspicious Minds", escrita por Mark James.

http://www.goear.com/listen/fcab35d/suspicious-minds-elvis-presley

A principal versión que existe de "Suspicious Minds" débese ó grupo de Birmingham Fine Young Cannibals, que a incluíron no seu disco epónimo de 1986.

http://www.goear.com/listen/77376fa/suspicious-minds-fine-young-cannibals

Train Kept A Rollin'

No espertar da década de 1950 cando a semente do rock empezaba a agromar a partir do blues e o jazz, Tiny Bradshaw, un dos principais cantantes de jazz gravou "Train Kept A Rollin'" en 1951, cun estilo que lembraba o swing máis clásico pero non pasaron moitos anos en ser adaptada ó novo son. 

http://youtu.be/ci4EQDD4CqA

Os primeiros que levaron "Train Kept A Rolling'" ás emerxentes listas de vendas do rock foron The Rock and Roll Trio en 1956, onde o carisma do seu líder Johnny Burnette chegou a eclipsar ó resto do grupo.

http://youtu.be/ufzRV3xspYA

Unha das bandas que se sentiron cativadas por esta canción foi The Yardbirds. Tal foi o cariño que os integrantes da banda lle teñen ó tema de Bradshaw que por unha parte, Jimmy Page gravou unha nova versión cando formou Led Zeppelin, e anos despois Jeff Beck tamén fixo a súa propia versión para unha película. A versión de The Yardbirds está incluída no álbum Having a Rave Up with The Yardbirds (1965).

http://youtu.be/Cd1gRHk28IE

E baseándose no riff de guitarra da versión de Johnny Burnette, a banda de Ohio The Black Keys, unha das últimas sorpresas agradables que xurdiron nos últimos anos na música rock, crearon "Lonely Boy", o single de lanzamento do seu sétimo álbum El Camino (2011).

http://www.goear.com/listen/005e1ac/lonely-boy-the-black-keys

I Put a Spell on You

Unha desas cancións inesquecibles que marcaron unha época e que nunca pasarán de moda é "I Put a Spell on You". O seu creador, Screamin' Jay Hawkins, un cantante de soul e rhythm & blues, posiblemente non se imaxinou a repercusión que esta canción ía ter non só para aqueles artistas que fixeron do soul o seu estilo predilecto, senón tamén para os rockeiros, que non dubidaron en incorporar o son das súas guitarras ás notas de "I Put a Spell on You". Incluída no disco de Screamin' Jay Hawkins At Home with Screamin' Jay Hawkins (1956), a canción pasou totalmente desapercibida, pero precisamente serían os artistas que a acabaron versionando quen colocarían esta excelente canción nos anais da música.

http://www.goear.com/listen/cda4a75/i-put-a-spell-on-you-screamin-jay-hawkins

Unha das primeiras versións que colocaron a canción máis famosa de Sreamin' Jay Hawkins nas listas de vendas foi a de Nina Simone en 1965. Unha das grandes damas do soul redescubriuna para o gran público nun momento fundamental na historia da música.

http://www.goear.com/listen/8ee1eb8/i-put-a-spell-on-you-nina-simone

Pero unha das versións máis lembradas é a de Creedence Clearwater Revival do álbum epónimo da banda dos irmáns Fogerty publicado en 1968. Malia que foron os integrantes de The Animals, Alan Price, por un lado, e Eric Burdon por outro, dos primeiros en empregar a electricidade neste tema, en 1968 a versión de Creedence Clearwater Revival supuxo toda unha revolución.

http://www.goear.com/listen/f79d0ff/i-put-a-spell-on-you-creedence-clearwater-revival

E que dicir do aire glam que o líder de Roxy Music, Bryan Ferry lle deu a súa versión.

http://www.goear.com/listen/dee4858/i-put-a-spell-on-you-bryan-ferry

Mesmo a dj Sonique se animou a lanzala en versión electrónica para as pistas de baile nunha proba máis da atemporalidade deste tema, que conta tamén con excelentes versións de Joe Cocker, She & Him e a que gravou Joss Stone con Jeff Becker, todas recomendables. Alguén lle pode pedir máis a unha canción?

http://www.goear.com/listen/53bf1a7/i-put-a-spell-on-you-sonique

E para rematar, o tema de Frank Sinatra "The World We Knew (Over and Over), un tema tradicional ó que Sinatra lle engadiu os acordes de "I Put a Spell on You". Foi publicada en 1967 no álbum do mesmo título.

http://www.goear.com/listen/8ee8168/the-world-we-knew-frank-sinatra

Hard to Handle

O soul viviu unha época de esplendor durante a década dos 60 e unha das voces privilexiadas que ensalzou este estilo orixinario dos Estados Unidos foi Otis Redding. O malogrado cantante nacido en Dawson, no estado de Xeorxia, converteuse nunha lenda grazas a cancións como "Hard to Handle", un éxito póstumo publicado no verán de 1968, seis meses despois de que Redding perdese a vida; unha nova traxedia para o soul que se sumaba á perda de Sam Cooke uns anos antes.

http://www.goear.com/listen/d133e84/hard-to-handle-otis-redding

Das numerosísimas versións de "Hard to Handle", os críticos musicais destacan a que fixo The Black Crowes no álbum Shake Your Money Maker (1990), o álbum de debut da banda dos irmáns Robinson, que acertan de cheo ó imprimirlle a "Hard to Handle" un toque rockeiro sen renunciar ó aire blues que emana a versión orixinal.

http://www.goear.com/listen/1982daf/hard-to-handle-the-black-crowes

One Step Ahead

A raíña indiscutible do soul, a gran Aretha Franklin comezou a forxar a súa lenda dende mediados dos anos 50 e nunca deixou de figuar o seu nome nas listas de vendas. Saber rodearse dos compositores adecuados, así como a carismática personalidade de Aretha formou unha combinación que elevou o soul a cotas que en principio parecian vetadas para un estilo clásico fronte o fenómeno rock que viviu a música na segunda metade do século XX. "One Step Ahead", unha das grandes baladas de Aretha Franklin publicouse en 1965.

http://www.goear.com/listen/641bc5c/one-step-ahead-aretha-franklin

O retrouso de "One Step Ahead" sampleouno o rapeiro Mos Def para crear un dos mellores temas de hip-hop dos noventa "Ms Fat Boody" do álbum Black on Both Sides (1999). 

http://youtu.be/FLC-xp92DxA

Synthetic Substitution

Un dos artistas que se habería de converter nun dos grandes referentes do hip-hop foi Melvin Bliss. En 1973 este cantante habería de coñecer a fama grazas ó tema "Synthetic Substitution", todo un bombazo nun momento en que a música se estaba transformando nun amplo abano de diferentes estilos. "Synthetic Substitution" caracterízase sobre todo polo ritmo que lle imprime a batería e que se convertería no reclamo para que esta canción non caíse no esquecemento.

http://youtu.be/JDHwtC5iv1U

Aclamada como unha canción imprescindible para os artistas de hip-hop especialmente polo son da batería, "Synthetic Substitution" foi sampleada un sinfín de veces, pero nós imos quedar cunha das poucas cancións electrónicas que se serviron desa batería. Trátase de "Extreme Ways", a canción de Moby que aparece no seu disco 18 (2002) e tamén na banda sonora de "The Bourne Ultimation", a última película da triloxía protagonizada por Matt Damon.

http://www.goear.com/listen/41dc6ac/extreme-ways-moby-

Everybody's Talkin'

Posiblemente Fred Neil non é dos cantautores estadounidenses dos anos 60 máis recordados pola súa traxectoria. Non obstante, Neil  compuxo unha das grandes cancións do século XX, "Everybody's Talkin'", do seu degundo álbum Fred Neil (1966). Malia que moitos ignoran que gravou a versión orixinal, a sona que colleu posteriormente este tema na voz de Harry Nilsson fixo que alomenos o nome de Fred Neil non caíse no esquecemento máis absoluto.

http://www.goear.com/listen/d5b6857/everybodys-talkin-fred-neil

En 1968 outro autor estadounidense, Harry Nilsson gravou unha nova versión de "Everybody's Talkin'" para o seu terceiro disco Aerial Ballet, que con toda probabilidade non colleitaría o éxito masivo que tivo se non fose por que foi seleccionada como banda sonora da película "Midnight Cowboy", de xeito que hoxe moita xente para referirse a esta canción fala da banda sonora de "Cowboy de Medianoite".

http://www.goear.com/listen/d19bfb0/everybodys-talkin-harry-nilsson

Dende entón, as versións sucedéronse constantemente, como por exemplo a dos australianos Crowded House, xa que este é un dos tema favoritos de Neil Finn.

http://youtu.be/q2oypJ8VlFI

Tamén se empregou como sample nalgunha canción. Unha delas é a do produtor Paul Oakenfold que en 2002 aproveitou a melodía de "Everybody's Talkin'" para o seu tema "Starry Eyed Surprise", do álbum Bunkka.

http://www.goear.com/listen/6223f2e/paul-oakenfold-bunkka-starry-eyed-surprise-

Tampouco desmerece nada a canción de The Go! Team "Everyone's a V.I.P. to Someone"  do disco Thunder, Lightning, Strike (2004), un fermoso tema instrumental.

http://www.goear.com/listen/0de1272/everyones-a-vip-to-someone-the-go-team