Radio Futura comezou como unha banda de rock da Movida pero non tardou en introducir paulatinamente os sons latinos na súa música desde moi cedo, o que lle conferiu un estilo propio, diferente das propostas das outras bandas da mesma xeración. Unha das primeiras achegas neste terreo foi "Semilla Negra", unha canción que aparece por primeira vez no segundo disco da banda dos irmáns Auserón La ley del desierto / La ley del mar (1984) e que habería de funcionar moi ben, tanto que vai decantar as preferencias do grupo, cada vez maiores, cara ós xéneros de fusión. Nun primeiro momento, esta canción estaba pensada para Miguel Bosé, pero este rexeitouna, así que se incorporou ó repertorio de Radio Futura con tan boa sorte, que ía ser unha das favoritas da banda.
"Semilla Negra" adoita estar en calquera recompilatorio de Radio Futura como no álbum en concerto que editaron en 1989. Logo tamén se habería incorporar ó disco Tierra para bailar (1992) con lixeiros cambios que haberían culminar na versión do recompilatorio Memoria del porvenir (1998), onde se acentúa o son funk e rockeiro.
No álbum tributo á Radio Futura, Arde la calle (2004) Marlango fai unha versión de "Semilla Negra" que nada ten que ver coas anteriores dos irmáns Auserón.
Ningún comentario:
Publicar un comentario