Fire Brigade

As orixes da Electric Light Orchestra ciméntanse sobre unha banda anterior pola que pasaron algúns dos seus máis ilustres membros. Trátase de The Move, na actualidade case relegada ó esquecemento a pesar dos intentos dos últimos anos de volver a pola en funcionamento. En calquera caso, The Move deixou para o recordo unha canción que habería de inspirar algunha que outra hoxe considerada mítica na historia do rock. Esa canción en concreto é "Fire Brigade" que se atopa no álbum epónimo con que esta banda de Birmingham se deu a coñecer en 1968.

https://youtu.be/UVys3YPRLWk

Un dos primeiros en fixarse no engado de "Fire Brigade" foi Paul Stanley, líder de Kiss, que tomou da canción de The Move algunhas ideas para o retrouso e algúns efectos sonoros que habería de reflectir en "Firehouse", unha das primeiras cancións de Kiss, pertencente ó álbum epónimo da banda de 1974 co que a a banda facía o seu debut.

https://youtu.be/JO3K3dqaQQs

Pero tamén se fixaron en "Fire Brigade" os Sex Pistols ó escribiren unha das cancións que xa forman parte da historia. O riff de "God Save the Queen", unha das cancións máis importantes do único álbum publicado pola banda, Never Mind the Bollocks, Here's the Sex Pistols (1977), está inspirado en "Fire Brigade", tal como Glen Matlock ten admitido algunha vez.

https://youtu.be/RvMxqcgBhWQ

Money's Too Tight to Mention

Outra de tantísimas bandas coñecidas por un só éxito, pero nas voces de outros é o dúo formado polos irmáns John e Billy Valentine, que nun alarde de creatividade  non acorde as súas composicións, presentáronse en sociedade baixo o nome de The Valentine Brothers. A andaina destes mozos de Ohio comezou a fins dos setenta e exitnguiuse unha década máis tarde tras catro discos sen pena nin gloria. A canción de The Valentine Brothers que máis triunfou foi unha incluída no segundo álbum, First Take (1982), titulada "Money's Too Tight to Mention", unha crítica social contra as políticas económicas que Ronald Reagan impulsou en Estados Unidos durante o seu mandato e que nun primeiro momento levou o país a unha recesión. Malia tratar un tema tan delicado como o da economía, a canción apenas pasou do top corenta nas listas estadounidenses.

https://youtu.be/wmbqOHdu3U4

Con todo, a canción ía converterse en todo un éxito uns anos máis tarde cando Simply Red a gravou para o álbum Picture Book (1985) e ó ser unha das canción estrela do disco, elixiuse como single de promoción, ata o punto de que hoxe moita xente afirma sen dubidar que se trata dunha canción da banda de Mick Hucknall.

https://youtu.be/04zwhjRiCbo

Jumpin' Jack Flash

O ritmo intrépido con que nos anos sesenta as bandas publicaban os seus traballos discográficos, ás veces máis dun disco por ano, facía que cada pouco tempo saíse ó mercado un compilatorio de grandes éxitos que recollían os últimos trallazos sementados e algunha canción inédita. Por iso non sorprende que no ano 1969 os Rolling Stones fosen xa polo seu segundo grandes éxitos oficial, Through the Past, Darkly (Big Hits Vol. 2) cando apenas levaban unha década revoluncionando o rock. Como adoitaba acontecer con cada álbum dos Stones, este contou con dúas edicións: unha británica e outra estadounidense onde non sempre coinciden as mesmas cancións e a orde das que si aparecen en senllas versións é distinta. Unha das inéditas que está nas dúas versións é  "Jumpin' Jack Flash", outro clásico da banda.

https://youtu.be/eQSGw0hMd_I

Como xa pasara con "Satisfaction" e Otis Redding, "Jumpin' Jack Flash" tamén foi interpretado por outra lenda do soul, neste caso por Aretha Franklin, quen realizou unha espectacular versión no álbum epónimo de 1986. O produtor da versión non foi outro que Keith Richards.

https://youtu.be/T2pdSQlm0GA

Unha canción cun riff moi semellante a de "Jumpin' Jack Flash" é a dos Kinks "Catch Me Now I'm Falling", pertencente a Low Budget (1979).

https://youtu.be/gCR83LxGKkg

Head over Heels

Tears for Fears acadaran unha colleita de boas críticas e de boas sensacións cando debutaron con The Hurting (1983), así que o seguinte álbum non podía defraudar; de feito, Songs from the Big Chair (1985) confirmou que Roland Orzabal e Curt Smith avanzaban na senda correcta. Co paso do tempo, ese segundo álbum é dos máis aclamados do dúo inglés, xa que contén algunhas cancións emblemáticas da discografía de Tears for Fears, coma "Shout" e "Everybody Wants to Rule the World". Outra tamén inesquecible é "Head over Heels", que se colocou nos primeiros postos das listas británicas e das estadounidenses.

https://youtu.be/NYx8IHJ9dWE

Leona Lewis construíu a súa canción "Favourite Scar", pertencente a Glassheart (2012) en torno a "Head over Heels". A de Leona Lewis é unha das cancións que a cantante elaborou xunto co líder de OneRepublic, Ryan Tedder, entre outros, quen tamén se encargou da produción deste tema.

https://youtu.be/eHDzzxpNQik

Dim All the Lights

Bad Girls (1979) é un dos discos favoritos dos fans de Donna Summer. Contén algunhas das cancións máis destacables na carreira da cantante e o traballo de produción de Giorgio Moroder e de Pete Bellotte é impecable. Nel conflúen distintos estilos no que predomina son disco, pero tamén hai sitio para o soul, o funk e mesmo o rock, estilos que Donna Summer dominaba á perfección, malia que ultimamente a súa memoria está restrinxida case por completo ás pistas de baile, onde demostrou que era a raíña. Nese álbum Summer incluíu a canción "Dim All the Lights", que en principio lla escribira para Rod Stewart, aínda que logo decidiu gravala ela mesma, e hai que dicir que foi un acerto, pois foi un dos singles máis exitosos de Bad Girls.

https://youtu.be/aaaxld1ugu0

Malia que non hai moitas versións de "Dim All the Lights", a máis coñecida corresponde á de Laura Branigan no seu compilatorio de grandes éxitos The Best of Branigan (1995). Foi unha das dúas cancións inéditas que Branigan incluíu nese álbum, aínda que en realidade tampouco achega nada novo, xa que a versión orixinal é case insuperable.

https://youtu.be/St1j6U84LBo

Como moitas cancións de Donna Summer, "Dim All the Lights" tamén foi obxecto de "parche" para outras cancións. Neste caso, na de Justice "B.E.A.T.", que é unha especie de revisión do seu gran éxito "D.A.N.C.E" e que aparecía na cara B deste single, canción estrela Cross (2007) co que os franceses debutaron.

https://youtu.be/EN3B_I4WA4c

What Comes Around

Pioneiros na mestura do rock co hip hop, dous estilos en apariencia incompatibles, Beastie Boys acabaron por liderar unha nova corrente musical que decontado habería de atopar seareiros dispostos a imitar o xeito de facer música deste grupo de Nova York. O produtor Rick Rubin, co que traballaron nos seus comezos, deulle forma ó proxecto e xa co segundo álbum, Paul's Boutique (1989), amosaron que os Bestie Boys eran unha banda de longo recorrido. Na canción "What Comes Around" rendénlle tributo ás influencias rockeiras que os inspiraron e para iso, empregan os retrincos de cancións dalgunhas das bandas máis coñecidas, como son Led Zeppelin e Alice Cooper, mentres que na letra menciónase algunha canción de The Ramones.

https://youtu.be/nSnDz70Ww1I

De Led Zeppelin escolleron un tema instrumental titulado "Moby Dick" que está recollido no álbum Led Zeppelin II (1969).

https://youtu.be/go12mVC8M-s

Outra das cancións que podemos atopar agochadas en "What Comes Around" é a de The Three Sounds xunto con Gene Harris, "Put on Train", pertencente ó álbum Live at It Club (1970).

https://youtu.be/tNPv6cIEZew

Finalmente, o tema de Alice Cooper "It's Hot Tonight", que abre o álbum Lace and Whiskey (1977), é o terceiro que compón "What Comes Around".

https://youtu.be/PacG2xOW1KI

Cryin'

Aerosmith era xa unha banda senlleira cando irromperon os anos 90, pero con Get a Grip (1993) Steven Tyler e compaña volvían á plena actualidade pondo o rock en primeiro plano, nunha especie de segunda xuventude para o veterano grupo, que comezara a súa andaina uns vinte anos antes. Mantendo firmes os seus principios, Aerosmith fíxose cunha nova xeración de fans que descubriron a súa música coas quince cancións que compoñen o disco, especialmente cos sete singles extraídos, que dan unha idea da calidade das composicións. Unha delas é a balada rock "Cryin'", onde un desgarrador Tyler canta o que sería un dos himnos desa década.

https://youtu.be/ivuAhoB8VzQ

Unha desas novas admiradoras que xurdiron ó abeiro de Get a Grip é a madrileña Belén Arjona, que no segundo álbum que publicou Infinito (2005) atrévese cunha versión en castelán de "Cryin'", á que titulou "Y lloré".

https://youtu.be/623KPj4uVWA

Sun (2)

Fíxósenos moi curta a anterior entrega dedicada ás cancións que conteñen no seu título a palabra "sol", así que evidentemente non podía pasar moito tempo sen unha segunda parte. Hai tantas e tan boas cancións sobre o sol! E iso que imos obviar as que xa pasaron por aquí coma a de A-ha, a de U2 e a de Coldplay. Así que non imos esperar máis e aquí van unhas seis máis.

Arrincamos cun tema de The Doors, "Waiting for the Sun", que aparece no álbum Morrison Hotel (1970). 

https://youtu.be/W1WnrjciO8c

Cambiamos agora radicalmente de estilo e imos cunha balada do mestre Joaquín Sabina, "Peor para el sol" do álbum Física y Química (1992). Trátase dun tema melancólico, pero moi fermoso. Unha das grandes historias de Sabina.

https://youtu.be/S9VYT-zMCyY

Seguindo con outro gran cantautor español, non podemos esquecernos de Antonio Vega e "Océano de sol", que titulaba o álbum de 1994 do ex Nacha Pop.

https://youtu.be/Is0BbqvaelQ

E que dicir da canción de Weezer "Island in the Sun"? Aparece no álbum epónimo da banda publicado en 2001 e con el o grupo californiano fíxose coñecido en todo o mundo.

https://youtu.be/HVHUjzZZGQ4

Volvemos a España, neste caso co debut en solitario de El Pescao que se producía en 2010 con Nada-Lógico e onde se incluía este "Buscando el sol".

https://youtu.be/K7ugiuXP_ao

E esta vez rematamos coa formidable canción de Biffy Clyro "Victory Over the Sun", un dos singles de Opposites (2013).

https://youtu.be/mR9HdYx4U2E

Bend and Break

Non parecía posible que nun mundo musical cada vez máis sofisticado a ausencia de guitarras en todo un álbum fose a triunfar e con todo, Keane presentouse en sociedade con só un piano e unha batería, e converteuse nunha das bandas revelación de 2004. Tom Chaplin, Tim Rice-Oxley e Richard Hughes souberon facer que unha carencia fose no fondo un engado no álbum co que se deron a coñecer, Hopes and Fears (2004). Lograron deste xeito crear un son orixinal moi fácil de identificar cunha banda que acababa de facer a súa aparición estelar, o que unido a unhas letras traballadas e a doce voz de Chaplin, garantían unha boa acollida por parte do público. "Bend and Break" foi un dos últimos singles que sacaron dese disco, pero tamén unha das cancións máis aclamadas.

https://youtu.be/KcwmQUi6Nn4

Chicane remesturou "Bend and Break" en 2006 e acabou por elaborar unha nova canción coa base e o retrouso da de Keane. Titulouna "Wake Up".

https://youtu.be/pBFLhGsUpfM

You Only Twice

A banda sonora das películas de James Bond forma un dos capítulos máis destacados da historia da música contemporánea. John Barry, compositor e produtor das primeiras películas da serie, as que conseguiron que o axente 007 se convertese nun dos mito do cine comercial, dotou cada un dos temas dun son persoal que se fixo característico das historias do personaxe creado por Ian Fleming e que todos os que o relevaron tratan de manter para que a banda sonora se siga identificando con James Bond. Unha das creacións máis aplaudidas de Barry foi "You Only Live Twice" para a película do mesmo título de 1967. O tema central está interpretado por Nancy Sinatra.

https://youtu.be/XgFtQPgHyek

Os acordes de "You Only Twice" son moi fáciles de identificar e inspiraron a outros artistas que os aproveitaron para os seus propios temas. O máis significativo é o de Robbie Williams, que homenaxeou a música de Barry con "Millennium", single de presentación de I've Been Expecting You (1998), aínda que máis ben case se pode dicir que é unha versión cunha letra diferente.

https://youtu.be/xcWOviMI6Lk

Co son algo máis disfrazado pero coa influencia inconfundible de Barry, Cee-Lo Green tamén recorre o son de James Bond en "Bright Light Bigger City", pertencente a The Lady Killer (2010).

https://youtu.be/R-JE5be7OA4

Torn

A historia da banda anxelina Ednaswap ten algo de mala sorte, pois pode dicirse que na súa ópera prima Ednaswap (1995) agochábase a esencia do éxito masivo, pero os seus membros nin sequera a chegaron a rozar, unicamente en forma de royalties. Iso lévanos a concluír que o azar é unha fada caprichosa que toca coa variña máxica a quen quere de forma aleatoria. Nese álbum de debut Ednaswap asinaba unha canción arquicoñecida para todos uns poucos anos despois, "Torn", pero no momento da súa publicación como single, pasou desapercibida para alomenos boa parte do mundo. Cando "Torn" se convertiu nun éxito mundial na versión de Natalie Imbruglia, Ednaswap estaba preparando o segundo disco cunha discográfica tan importante como Island, pola que acababa de fichar, e, aproveitando o tirón, volveu incluír "Turn" cunhas lixeiras variantes respecto á primeira versión, xunto con outros temas do primeiro disco no novo. Non serviu de nada, xa que iso non se viu reflectido no número de vendas.

https://youtu.be/-7ULhmJIi4s

A pesar de ser unha actriz consagrada en Australia, Natalie Imbruglia deu o salto á música co álbum Left of the Middle (1997). Nel Imbruglia mostraba que tamén era unha gran compositora, xa que participou na elaboración de tódalas cancións, agás en dúas. Unha delas era a única versión allea do álbum, "Torn", que ademais de ser o corte 1 do disco, tamén se escolleu como single de lanzamento. O éxito que acadou foi brutal e causoulle a Natalie Imbruglia unha depresión que retrasou varios anos a preparación do segundo disco.

https://youtu.be/SgNvWfCMMh0

Terro 3000 sen chegar a facer unha versión de "Turn", incluíu algunhas partes da de Natalie Imbruglia no seu tema "This Is How I Feel" (2008).

https://youtu.be/tuTbmIarX2o

Folk Singer

Na dilatada traxectoria de Johnny Cash atopamos cancións que nos contan todo tipo de historias variadas, desde as que falan de inxustizas ata aquelas máis románticas, pero nelas tamén aparecen personaxes coma a figura do cantautor, á que Cash lle canta en "Folk Singer", ou tamén coñecida simplemente como "The Singer" para distinguila dunha canción de Tom Roe. "Folk Singer" parece unha canción menor dentro do repertorio de Cash, case unha canción esquecida, xa que só se publicou como cara B de "Folsom Prison Blues" e non se incluíu despois en ningún dos discos que Johnny Cash editou. Con todo, foi unha canción que logo da súa publicación contou con algunhas versións doutros cantautores.

https://youtu.be/9FZV_oh7YGE

A versión que Nick Cave and the Bad Seeds fixo en 1986 co título de "The Singer" foi a que maior transcendencia tivo. Pertence ó álbum de versións Kicking Against the Pricks.

https://youtu.be/WVGGd2sKEtM

(At Your Best) You Are Love

De tódalas cancións que se fixeron dedicadas ás nais, a de The Isley Brothers "(At Your Best) You Are Love" é sen dúbida, das máis sentidas. Pertence ó album número catorce do grupo de soul e funk Harvest for the World (1976) e malia que na actualidade é unha das cancións máis coñecidas da discografía de The Isley Brothers, no momento da publicación do álbum non se considerou escollela como single, talvez debido a que se trata dun tema lento, que non encaixaba moi ben cos outros temas bailables do disco, que tiñan máis posibilidades de triunfar.

https://youtu.be/Hpci0Pxb8kk

Posiblemente a versión de Aaliyah no seu álbum de debut Age Ain't Nothing but a Number (1994) é a máis coñecida, e case vinte anos despois da publicación da orixinal, axudou a que "(At Your Best) You Are Love" seguise sendo coñecida para os novos seguidores do R&B e do soul.

https://youtu.be/5i0XGs39BrQ

Drake foi sempre un namorado da música de The Isley Brothers, como demostra algunha das reinterpretacións que fixo dos temas do grupo, pero para "Unforgettable", pertencente a Thank Me Later (2010), o álbum do seu debut, serviuse da versión de Aaliyah de "(At Your Best) You Are Love" para as primeiras notas.

https://youtu.be/8qbIhceoAjU

Fisherman's Blues

Para o cuarto álbum de The Waterboys, Fisherman's Blues (1988), Mike Scott decidiu darlle unha volta ó son da banda. Cara a finais dos oitenta, o folk irlandés parecía renacer no pop rock do momento; Simple Minds introducía nalgunha das súas cancións un toque celta e o éxito que estaba colleitando The Pogues deixaba ás claras a nova tendencia, así que The Waterboys tamén decidiron contribuír á moda. De aí que no novo álbum se afondase máis nese compoñente folk, que a dicir verdade sempre estivo latente na música de The Waterboys. Con algunha versión de Van Morrison e a musicalización dun poema de Yeats, Fisherman's Blues é un dos discos máis representativos de The Waterboys e a canción que lle dá título é unha boa mostra da arte da banda.

https://youtu.be/_VKouBHarIo

A música de The Waterboys é unha das grandes referencias do son de Celtas Cortos. No álbum de versións que os de Valladolid fixeron chamado Introversiones (2010) non podía faltar un tema de The Waterboys, e neste caso o elixido foi "Fisherman's Blues", que ademais abre o disco. Adaptada ó castelán, "Blues del Pescador" é unha das cancións máis coñecidas do disco.

https://youtu.be/isEYYOiMtCU

Sun

Retomamos de novo os posts monográficos. O de hoxe vai dedicado ó Sol, que coa súa luz anuncia a chegada do bo tempo, algo que metaforicamente sempre se asociou a un período de felicidade. As seis cancións que eliximos para esta entrada son unha pequena mostra dunha amplísima variedade de cancións que levan no título a palabra "sol", así que non descartamos que haxa unha segunda parte desta entrega noutra ocasión. Acéptanse propostas.

A primeira delas é a canción dos Beatles "Here Comes the Sun", escrita por George Harrison, que se incluíu en Abbey Road (1969).É sen dúbida unha das mellores cancións do álbum e evoca os beneficiosos efectos do sol.

https://youtu.be/C5E_zXbmrlM

Janis Joplin tamén lle escribiu unha canción ó sol co espíritu do flower power. O resultado foi "Flower in the Sun", un single póstumo que se publicou en 1972.

https://youtu.be/2vNczrinFRo

No álbum de 1987 The Uplift Mofo Party Plan Red Hot Chili Peppers incluían a canción "Behind the Sun", que haberían de sacar como single cinco anos despois.

https://youtu.be/gsC9KwiknTs

Con reminiscencias cara ó final da canción dos Beatles "Here Comes the Sun", Soda Stereo asinou no álbum Canción animal (1990) a fantástica "Cae el sol", unha das mellores composicións de Gustavo Cerati e Daniel Melero.

https://youtu.be/7pxzYVc_lNQ

A seguinte canción que vén a continuación foi publicada en 1997. Pertence ó album de Supergrass In It for the Money (1997) e trátase de "Sun Hits the Sky", single que se publicou na primavera, aproveitando a chegada do sol e as altas temperaturas.

https://youtu.be/OJ8TYNpJdLg

E xa para rematar por hoxe, quedamos coa sensacional "Sun" de Two Door Cinema Club, que aparece no álbum Beacon (2012).

https://youtu.be/sKyK1Mme9Sc

(I'm Not Your) Steppin' Stone

Sempre coa idea de deixar unha pegada no rock, tódolos grupos buscan alomenos unha soa canción que lles abra tódalas portas. Paul Revere & The Raiders conseguírono con algunhas cancións como "(I'm Not Your) Steppin' Stone", pertencente ó quinto disco Midnight Ride (1966). Se temos en conta que precisamente neses anos non era doado facerse cun sitio na puxante escena rock, Paul Revere & The Revere tiveron o seu premio sobre todo con esta canción que leva a sinatura de Tommy Boyce e de Bobby Hart, quen tamén se encargaron de producila.

https://youtu.be/UkD5HDDzdZ8

Tamén nese álbum atópase a outra gran canción de Paul Revere and The Raiders "Kicks".

https://youtu.be/bhbU_n62ePY

Xa ese mesmo ano de 1966 "(I'm Not Your) Steppin' Stone") contou coa súa primeira versión, desta volta da banda de ficción The Monkees, que a acabaron popularizando, ó igual que fixeron con "Kicks".

https://youtu.be/nCM7qcRyfKo

E moi influenciados polas principais cancións de  Paul Revere & The Raiders, The Hives achegaban o son desta banda ós seus seguidores en "Two-Timing Touch and Broken Bones", unha das cancións de Tyrannosaurus Hives (2004).

https://youtu.be/zkLEdC-Jn28