A sensibilidade e o lirismo das letra e da música de Leonard Cohen están presentes desde os seus primeiros traballos discográficos. Con cada álbum que o canadense ía sacando á luz aumentaba o seu prestixio e non tardou en converterse nun dos grandes referentes do folk máis intimista. En 1971 aparecía o seu terceiro disco Songs of Love and Hate con oito cancións, algunha das cales son das máis versionadas da discografía de Cohen. É o caso de "Famous Blue Raincoat", que ademais das numerosas versións que se fan cada ano, é un dos temas máis influentes.
No que respecta á melodía, "Famous Blue Raincoat" deixou rastros nas composicións doutros autores inclinados por estilos máis comerciais có folk. Na melosa canción de Albert Hammond "When I Need You" parece reproducirse por momentos a liña melódica da canción de Cohen. "When I Need You" pertence ó álbum de Hammond do mesmo título editado en 1976, pero acadou renome na voz de Leo Sayer un ano despois ó colocala nas primeiras posicións das listas.
E algo parecido ó que lle ocorreu a Albert Hammond pasoulle a Elton John co tema "Little Jeannie", de 21 at 33 (1980), aínda que esta vez as semellanzas parecen estar máis emparentadas con "When I Need You" que con "Famous Blue Raincoat". Por se fose pouco, esta canción de Elton John tamén recorda a unha anterior do propio artista.
Sen dúbida, é inevitable escoitar "Little Jeannie" sen acordarse de "Daniel", o éxito de Elton John que aparece en Don't Shoot Me I'm Only the Piano Player (1973).
Ningún comentario:
Publicar un comentario