Mellon Collie and the Infinite Sadness (1995) consagrou definitivamente a The Smashing Pumpkins como unha das mellores bandas de rock dos 90. O rock que impregna a súas cancións emparéntase co grunge que se estaba a desenvolver na época, xa que cada acorde reflicte a mesma actitude que volvera situar o rock americano en primeira liña. Pero este terceiro disco do grupo liderado por Billy Corgan é moito máis variado do que se poida pensar nun primeiro momento. Entre as excelentes cancións que o compoñen hai unha que sobresae, non só pola súa beleza senón tamén debido á instrumentación, sorprendentemente distinta ás demais cancións, pois nela participa a orquestra sinfónica de Chicago, que lle dá un toque clásico e solemne que non se atopa no resto do álbum. "Tonight, Tonight" escolleuse como terceiro single e o videoclip é unha homenaxe ós comezos do cine.
En 2010 Passion Pit fixo unha estupenda versión de "Tonight, Tonight" en clave electropop, que ata se pode cualificar de elegante. Está recollida en Pioneer Sessions 2010 Revival Recordings.
Ningún comentario:
Publicar un comentario