Cando os Beatles editaron Help! (1965) a banda de Liverpool xa se rodeara dun aura de prestixio entre os seus contemporáneos, que non dubidaban en aclamalos como os máis grandes. Pero en realidade Help!, que para nada é un mal álbum, simplemente pechaba unha etapa na andaina dos Beatles, porque apenas uns meses despois coa publicación de Rubber Soul ían situar a psicodelia musical nun primeiro plano ó introduciren as influencias que recolleran na India, e pode dicirse que a partir de aí, si xustificaban con creces as loas que tanto tempo lle dedicaban á vez que o seu son se afastaba das restantes bandas do momento. Por iso, coa perspectiva que dan os anos, Help! semella ás veces un disco menor na discografía dos Beatles cando realmente contén grandes cancións como "Yesterday", "Ticket to Ride" e a que lle dá título. George Harrison contribuíu con tres cancións no álbum, no que o tándem Lennon-McCartney leva o maior peso nas composicións, como é habitual. "You Like Me Too Much" é unha das que leva a sinatura de Harrison.
E sen ser das cancións máis destacadas do disco, o son do piano de "You Like Me Too Much" formou parte da canción "Temporary Like Achilles", doutro grande da época, Bob Dylan. "Temporary Like Achilles" pertence ó álbum Blonde on Blonde (1966).
E cun son en xeral moi parecido a "You Like Me Too Much", The Coral incluíron no álbum Magic and Medicine (2003) a canción "Pass It On".
Ningún comentario:
Publicar un comentario