Hai moito tempo que os rapaces de Radiohead van por libre. A música que fai Thom Yorke, tanto en solitario como coa banda, está por enriba de calquera etiqueta coa que se poida clasificar. Sempre cun son vangardista que marca tendencia, levando os sons electrónicos un paso por diante, a reputación de Radiohead como banda de culto non fai máis que medrar, malia que moitos dos seus fans primixenios quedaron polo camiño e o gran público só os coñeza por "Creep", ese remedo dunha canción de Albert Hammond que Yorke acabou por odiar. En outubro de 2007 aparecía o sétimo álbum de estudio da banda, In Rainbows, no que a canción "Reckoner" brilla especialmente.
Chase and Status, banda de música electrónica procedente de Londres, conta no seu segundo álbum, No More Idols (2011), coa canción "End Credits", single que editaron en 2009 e que ten algunhas reminiscencias de "Reckoner". En "End Credits", Chase and Status lograron a participación do rapeiro Plan B, que tamén é un dos autores do tema.
Ningún comentario:
Publicar un comentario